La baxa puntuación del xuráu profesional dexa terceres a Tanxugueiras, les preferíes del públicu

|
Tanxugueiras final Benidorm Fest

La cubana Chanel va ser la representante que lleve RTVE al certame d'Eurovisión en Turin.

'Terra', el cantar en gallegu qu'inclúi la frase 'non hai fronteiras' n'asturianu, eusquera, catalán y castellanu, foi'l preferíu del votu demoscópicu y el televotu na final del Benidorm Fest, con un valor caún del 25 por cientu de la puntación final total. 30 puntos, el máximu, recibió Tanxugueiras pa sumar 60 nos dos conceptos, cantidá insuficiente pa ganar el billete pal Piemont.

La baxa puntuación del xuráu profesional, con 30 tamién, asitiando al tríu formáu por Olaia Maneiro, Aida Tarrío y Sabela Maneiro en quinta posición, per debaxo de Chanel (51), Rigoberta Bandini (46), Blanca Paloma (39) y Rayden (37), marcaría'l concursu. Chanel quedaba segunda nel demoscópicu (25) y tercera nel televotu (20), intercalando posiciones con Rigoberta Bandini, polo que la clasificación final quedó asina: Chanel, 96 puntos; Rigoberta Bandini, 91; y Tanxugueiras, 90.

D'esta forma el cantar 'SloMo', qu'amiesta castellanu y inglés, va ser el cantar que represente a España esti añu n'Eurovisión, que sigue ensin llevar nenguna de les llingües estatales diferentes al castellanu al festival. La so intérprete ye Chanel Terrero, una cubana de 31 años que lleva dende los 3 viviendo en Catalunya y que cuenta con una trayeutoria amplia en musicales.

Magar la so escelente actuación, la so victoria nun tuvo exenta de polémica pol apoyu que tuvo del xuráu profesional y pol conteníu de la lletra de la canción que va defender n'Italia, estremáu del mensaxe de defensa de la multiculturalidá, la tradición y el feminismu de Tanxugueiras, que vivieron un incidente na semifinal al introducir les presentadores 'Terra' falando de llingües inventaes, o'l tamién feminista de Rigoberta Bandini. Les reaiciones llevaron a RTVE a asoleyar ayeri un comunicáu nel que se comprometía a "ameyorar, de cara a ediciones próximes, tol procesu del Benidorm Fest".

Contador Estadistiques