El públicu da'l pase a la final a Tanxugueiras

El tríu de pandereteres gallegu ta ente los favoritos pa dir a Eurovisión col cantar 'Terra', nel que citen la frase "non hai fronteiras" en dellos idiomes, ente los que ta l'asturianu.

Con polémica pola baxa puntuación del xuráu magar la bona actuación y puesta n'escena de la formación, Tanxugueiras ta na final de mañana del Benidorm Fest gracies al votu demoscópicu y el televotu. Con un pesu del 50 por cientu nel total, les persones escoyíes por RTVE pa valorar a los participantes dieron la quinta meyor puntuación a Olaia Maneiro, Aida Tarrío y Sabela Maneiro, provocando la protesta de los presentes nel Palau d'Esports L'Illa y de les redes sociales.

Nun foi la única cuestión qu'indignó, yá que les presentadores Inés Hernand y Alaska fixeron na introducción a Tanxugueiras referencia a llingües inventaes, coles que Bélxica participó n'Eurovisión en dos ocasiones. 'Terra', en gallegu, ye l'únicu cantar nuna llingua diferente al castellanu y, ente otres cuestiones, ye una reivindicación de los idiomes del Estáu al citar la frase "non hai fronteiras" n'asturianu, eusquera, catalán y castellanu.

A les 22.10 hores, per La1, va retresmitise en direuto la gran final del Benidorm Fest, na que participen, amás de Tanxugueiras, que van actuar en segunda posición, Chanel, Blanca Paloma y Varry Brava, procedentes de la primer semifinal, y Rigoberta Bandini, Rayden, Xeinn y Gonzalo Hermida, de la segunda. El ganador va representar a RTVE n'Eurovisión, qu'esti añu va celebrase n'Italia, na población piamontesa de Turin.

Na imaxe, un momentu de l'actuación de Tanxugueiras el miércoles.