La Banda de Gaites Villa de Xixón presenta nel Xovellanos ‘Spirum’, el so primer discu

Cola collaboración de Tuenda, Marisa Valle Roso y José Ángel Hevia, ente otros, la Banda de Gaites Villa de Xixón va presentar en direuto el so primer discu, ‘Spirum’, nel Teatru Xovellanos. Esti conciertu especial coincide cola anuncia de la creación del grau superior de gaita el cursu próximu.

‘Spirum’ ta inspiráu na historia de la ballena que varó en Xixón nel 1895 –ye’l nome que recibe en llatín los furacos polos que respiren estos mamíferos marinos– y trátase d’un viaxe musical pel Atlánticu, como’l que pudo facer esi cetaceu. Asina amiesten dellos estilos, como’l jazz y la salsa, con sones asturianos.

Inaciu Galán collaboró na recreación d’esi viaxe imaxinariu peles costes de dambos llaos del océanu que baña la nuesa mariña y nel que se basa l’espectáculu que se va representar mañana, a les 20.30 hores, nel Teatru Xovellanos. Les entraes tán a la venta a 5 y 8 euros.

Xunto a los 35 integrantes de la Banda de Gaites Villa de Xixón van xubir al escenariu les persones que participaron na grabación del discu, casu de Tuenda, Marisa Valle Roso o José Ángel Hevia, ente otros.

Enseñanza superior

El Gobiernu tien la intención de crear el grau superior de gaita'l cursu qu’entra, completando asina la formación nesti instrumentu a nivel de cualquier grau universitariu, qu’hasta agora tenía namái enseñu elemental y profesional. Va constar de cuatro cursos más, hasta completar 14, que se van impartir n’Uviéu, nel Conservatoriu Superior de Música Eduardo Martínez Torner, baxo’l nome de ‘Instrumentos de la Música Tradicional y Popular d’Asturies’.