L'éxodu de los refuxaos asturianos na Guerra Civil

Alredor de 20.000 persones embarcaron en dellos puertos asturianos en 1937 cola fin de dexar atrás les penuries de la guerra - Munches cayeron preses del bandu ‘nacional’ y non pocos perdieron la vida por fundimientos provocaos. - El 23 de setiembre un barcu con mil neños y neñes salió de Xixón

Nestos tiempos de vergoña nos qu’a les yá habituales imáxenes de la valla de Ceuta y Melilla súmense les de les muertes nel Mediterraneu y les de los sirios qu’escapen de la guerra per tierra hacia Europa, convién recordar que n'Asturies, non munchayá, decenes de miles d'asturianos tamién tuvieron que fuxir como refuxaos.

Asturies.com recupera un artículu firmáu por Lisardo Lombardía, espublizáu orixinalmente nel númberu 4 de la revista ‘Asturies. Memoria encesa d’un país’, de la Fundación Belenos n'avientu de 1997, y qu'asoleyó Asturies.com en formatu dixital y nuna edición curtia, en 1998 nel marcu d'un alcuerdu cola revista.

L'artículu estrémase en dos partes, per un llau la llegada de los asturianos a Bretaña, y per otru les noticies sobre la mesma na prensa local. Al final llegaron unos 10.000 asturianos a les costes franceses, 2.300 a Bretaña, onde foron bien recibíos, como amuesen les cróniques de la fecha.