Acoyida de refuxaos asturianos en Bretaña

Demientres tola guerra civil, Francia fue'l destín escoyíu pola mayoría de los refuxaos qu'afuxíen del avance del exércitu "nacional".

Quien al entamu del conflictu miraben de refuxase en Portugal, pudieron comprobar de sópitu la simpatía y collaboración que'1 réximen de Salazar daba a los solevaos. Col vecín Ibéricu nun se podía cuntar pa nada.

El desendolcu de los acontecimientos bélicos fizo'l restu, y el gobiernu francés, tamién d'un Frente Popular presidíu pol socialista Leon Blum, atopóse col problema de que, de contino, llegaben refuxaos al so territoriu.

Pa face-y frente, les autoridaes franceses encargaron a los Prefectos y Subprefectos de cada departamentu alministrativu la coordinación de l'acoyida: busca-yos abellugu en comuña colos ayuntamientos, organización de les ayudes que de mano fueren menester, xestión de les partíes presupuestaries destinaes al casu, desarme de los efectivos militares qu'aportaren y repatriación hacia los pasos de frontera escoyíos polos recién llegaos.

Depués de la revolución d'Asturies de 1934, Bretaña, y en concreto el departamentu de Finistére, con capital en Quimper, yá tenía recibío dellos refuxaos.

La sociedá bretona taba per aciu d'ello sensibilizada hacia los dramáticos acontecimientos qu'asocedíen na Península Ibérica, y el nuevu éxodu provocáu pol golpe d'Estáu del 18 de xunetu dio aniciu, dende bien ceo, a un sentimientu de solidaridá pa colos afuxíos del conflictu. Asina entamáronse comités d'acoyida, organización de bailles y fiestes de sofitu, colectes...

Los sindicatos y les fuerzes d'izquierda, comu yera previsible, tuvieron un protagonismu en forma nesti fenómenu, pero la mesma sociedá civil movilizóse espontáneamente a favor de los refuxaos, como lo preben dalgunes proclames y artículos asoleyaos na prensa rexonal la cabera quincena del mes d'Ochobre de 1937.

Le Rappel du Morbihan (30-X-37)

AYUDEMOS A LOS REFUXAOS

"Les muyeres, los neños, los vieyos de Bilbao, de Santander y d'Asturies afuxeron delantre l'horror de los bombardeos entamaos polos aviones italianos. Alcontraron un refuxu provisional nel suelu de Francia.

Agora fueron repatriaos pa Cataluña y la provincia de Valencia. Facemos una llamada nel so ausiliu al ver la so dura miseria, que I'iviernu va convertir en más xabaz aínda.

Allá abaxo, la población tien falta de fariña, de zucre, de xabón, de víveres de toles clases. ¿Cuál va a ser la suerte de los desgraciaos refuxaos si la solidaridá del pueblu de Francia nun s'exerce n'abondo a la so escontra?

Tamos seguros que el 31 d'Ochobre, la gran xornada nacional aidará grandemente a amenorgar los sufrimientos d'estos inocentes.

Georges Buisson, Secretariu de la Confederación Xeneral del Trabayu (CGT )".

Le Finistére (30-X-37)

UN PESQUERU QUE TRESPORTABA REFUXAOS ESPAÑOLES ENCALLA

Na mañana del sábadu, el pesqueru español "Huerta" que tresportaba 120 milicianos y refuxaos, arrastráu pola boriada, encalló delantre de Saint Pierre-Penmarc'h. Una terrible catástrofe pudo evitase gracies a la celeridá de los socorros y al esfuerzu de los salvavides.

Nun hubo víctimes. Ocho milicianos feríos fueron treslladaos al hospital de Quimper y el restu a la colonia de Poulgoazec.

Esta corriente de simpatía pa colos refuxaos republicanos, nun quitaba qu'esistieren delles opiniones reticentes a la so presencia.

La propaganda del bandu enemigu, bien apercontiada polos sos aliaos, Alemania y Italia, teníase esmolecío en cargar les tintes sobre la so fama de radicales y, nel casu concretu de los asturianos, de revolucionarios dafechu.

A esto hai qu'añadir el difícil equilibriu formal en que les potencies democrátiques, y en particular los gobiernos de Londres y París, trataben de desenvolvése comu consecuencia del pactu de "Non Intervención" suscritu na Sociedá de Naciones, y les sos disposiciones.

Y ello magar que'l nombráu "Comité de Non Intervención" supusiera na práctica torgar cualisquier posibilidá d'autodefensa al gobiernu republicanu, comu Francia y Inglaterra persabíen.

Nestes circunstancies l'actitú de la prensa en xeneral, yera la de tar sollertes ante la llegada de los continxentes d'evacuaos procedentes de les costes asturianes.

Espublizábense cróniques perdetallaes, y cualisquier inquiz yera espeyáu nes páxines de los medios de comunicación, sobretoo nos de calter conservador.

Una carta asoleyada pol alcalde de Lorient, Emmanuel Svob, peramuesa esti estáu d'opinión:

Le Nouvelliste (28-X-37)

"Sr. Director:

Munchos tracamundios se tienen esmucío nel so númberu del llunes tarde al respetive de l'actitú de los milicianos españoles en Lorient y por ello quedaría-y peragradecíu si tuviera a bien espublizar esta carta.

A petición del señor subprefectu, la ciudad agospió y alimentó a un ciertu númberu d'ellos, bien fuera nel hospiciu o en diferentes servicios municipales. Y, contrariamente a lo que pudiera decise, comportáronse, al respetive del personal puesto a la so disposición, con una corrección dafechu; los insultos y les cacíes frañaes son pura imaxinación del too.

Los refuxaos acoyeron al Sr. Bousquet, subprefectu y al Sr.Moysan, el so adxuntu, colos gritos de ¡Viva Francia!, y ún d'ellos que sabía falar la nuestra llingua dio-yos gasayosamente les gracies.

Camenté que se-yos debia un restablecimientu de la verdá a estos desventuraos y toi seguru que vusté pensará lo mesmo.

Reciba Sr. director etc ...

SVOB, alcalde de Lorient."

Autor: Lisardo lombardía/ Revista Asturies.