L’historiador González Calle recupera la historia de la fragua de Villalegre

L'Asociación Cultural "La Foz del Pielgu" convoca pa esti miércoles día 25 de xineru a les 7 de la tarde nel Club Popular de Cultura de Llaranes una conferencia del historiador Jesús Antonio González Calle, Doctor pola Universidá d'Uviéu y Premiu "Juan Uría" 2002 sobre'l "martinete de Villalegre" una esperiencia preindustrial nel Avilés de la Edá Moderna cola que s'intentó empobinar el llabor tradicional de los artesanos caldereros d'Avilés y Miranda a métodos de producción y comercialización más efectivos.

Dende la so fundación nel añu 1755 hasta mediaos del sieglu XIX, bien de la economía d'Avilés taba venceyada colos productos semiellaboraos que salíen de la fragua, na que se trabayaba mayormente'l cobre. La fragua de Villalegre, arreyada a un palaciu con capiella propia, trancó pola decadencia de los sos procesos al nun remocicase y vese superada por otres instalaciones más modernes y los sos restos desaniciáronse mayormente pola llegada de planes urbanísticos de recién, siendo la construcción d'una escuela la qu'esfarrapló'l palaciu y la ilesia que taben xunta la fragua, siendo qu'esta inda se caltién, polo que los espertos piden que se recupere y nun se consienta'l so esbarrumble.