Johannesburgo nun pon igua a la contaminación

El Cume mundial sobre'l desarrollu sostenible de Johannesburg (Sudáfrica) entra estos díes na fase de conclusiones. Diez años depués del de Río de Janeiro, esti cume presentábase como la gran oportunidá de tornar l'actual modelu de desarrollu, que ta dañando los ecosistemes y los sistemes climáticos del planeta. Cuando'l venti por cientu de los estaos consumen l'ochenta por cientu de los recursos enerxéticos del planeta y los datos sobre l'efectu invernaderu ya nun hai quien pueda guardalos embaxo l'alfombra, esperábase que tolos países firmaren (y se comprometieren a cumplir) el protocolu de Kyoto sobre emisiones a l'atmósfera y abriesen una puerta al desarrollu de les enerxíes renovables, en cuenta de seguir apostando pol consumu masivu de combustibles fósiles, como primeres arbíes que preparasen un futuru que nun emporcare la tierra como vieno faciéndose durante'l sieglu acabante terminar. Sicasí, la oposición de los países más ricos, colos EUA echando p'atrás toles propuestes empobinaes nesti sentíu, ta dexando pa prau otra vuelta la posibilidá d'un cambéu efectivu que vaiga más allá del papel moyao de les firmes de documentos que dempués nun se cumplen. Anque Rusia y Canadá tan acabante de xuntase al por demás incumplíu Protocolu de Kyoto, los más de los compromisos algamaos nun recueyen oxetivos concretos, casu del documentu sobre enerxíes renovables, nel qu'amás nin siquiera se consiguió l'oxetivu de destina-yos a estes enerxíes el 15% del total de la producción mundial, como proponía la UE. La oposición de los EUA, amagostada colos grandes productores de petróleu, amuesa la debilidá d'esti cume, que va pesllar en falso.Llama l'atención que mientres el mundu entero miraba pa Sudáfrica, los países productores de petróleu aconceyaren, ironíes del destín, precisamente en Río de Janeiro, onde se celebra'l XVII Congresu Mundial de Petróleu y Gas. Anque dende Brasil dicen que'l mercáu anda revueltu, los países presentes en Río trabayen con una espectativa de aumentu del consumu de petróleu pal añu qu'entra, xusto lo contrario de lo que se pretendía en Sudáfrica. Pa más aquello, cuando la estracción de petróleu ye un negociu rentable per se, resulta que ye una industria altamente subvencionada. Pa saber más sobre'l cume de Johannesburg, esisten un carráu de webs más grande del que podemos enxertar equí, anque citaremos les que nos paecen más curioses. D'una banda tan los webs oficiales de la ONU y l'especial del cume, mientres que d'otra ta la bayura de webs puestos na rede polos estremaos colectivos ecoloxistes y antiglobalizadores presentes estos díes en Sudáfrica anque poco visibles tres les medíes de seguranza policiales. El web de Greenpeace ye parada obligatoria, anque nun dexamos de recomendar la visita al especial de La Insignia y al web de earthsummit.biz que parodia'l cume como si fuere la entrega de los Óscar. Tamién paga la pena la visita al web catalán de Sostenible, que ta faciendo un bon seguimientu.