IX sofita’l pidimientu de l’ALLA a Virgili pa que l’asturianu tenga una mayor presencia na TPA

|
Ramón Argüelles y Vicente Bernaldo de Quirós

“L’asturianu ye un elementu clave pa desarrollar producción propia y serviciu públicu de televisión”, afirma Vicente González Bernaldo de Quirós, representante d’IX nel conseyu d’alministración de RTPA. La coalición sofita’l pidimientu de l’ALLA d’una mayor presencia del idioma, con un informativu dafechu en llingua asturiana.

Na reunión última del conseyu d’alministración de la RTPA la situación del asturianu nel ente públicu de comunicación foi ún de los temes que se trataron a propuesta d’Izquierda Xunida (IX) por mor del aconceyamientu del direutor xeneral Antonio Virgili col presidente de l'Academia de la Llingua Asturiana (ALLA), Xosé Antón González Riaño. “Esmolécenos que l’asturianu nun tenga tanta presencia na RTPA como debería y por eso nos sumamos al ‘alcuerdu’ de l’Academia de la Llingua pa qu’esista una mayor presencia del asturianu. Creemos qu’esto ye fundamental porque amás ye una manera non sólo de cumplir col artículu 4 de la Llei d’Usu, sinón tamién col fechu de que se desarrolle una diversidá llingüística importante ”, aseguró González Bernaldo de Quirós, qu’añadió que “queremos facelo dende’l consensu”.

D’igual forma recordó los datos del avance de la III Encuesta Sociollingüística d’Asturies, encargada pola ALLA y fecha por Francisco José Llera Ramo, que dicen que “un 43 por cientu de los encuestaos se manifiesta a favor d’una mayor presencia del asturianu en televisión”. Por ello, pide l’apertura d’un alderique “non sólo nel conseyu d’alministración, sinón tamién ente les fuercies polítiques, sociales y culturales d’Asturies” sobre’l papel qu’ha de xugar la llingua asturiana na RTPA.

Importancia del contratu programa

IX considera tamién que ye necesario que’l Gobiernu comience la ellaboración d’un contratu programa pa la so aprobación na Xunta Xeneral y esixe que la RTPA cumpla la Llei Xeneral de la Comunicación Audiovisual qu’implica que’l 6 por cientu del presupuestu xeneral añal se dedique a la producción de materiales cinematográficos y televisivos. Al respeuto, na rueda de prensa, na que tuvo tamién Ramón Argüelles, coordinador xeneral d’IX, recordóse qu’hai yá trés años que s’aprobó la II Llei de Reforma del Sector Público que  plantegaba la puesta en marcha de dichu contratu programa col qu’evaluar y desarrollar tolos elementos pa que la RTPA tenga calidá, continuidá y posibilidaes d’articular cultural y territorialmente Asturias.

“Ye hora de qu’aniciemos l’alderique pa saber qué ye lo que más nos interesa pa la defensa de la nuesa televisión pública y p’ameyorar culturalmente la nuesa comunidá autónoma”, esplicó González Bernaldo de Quirós.

Na semeya, Argüelles y Bernaldo de Quirós.

Contador Estadistiques