Investigaciones sobre prosodia protagonicen el miércoles de les Xornaes Internacionales d'Estudiu

|
Xosé Ramón Iglesias Cueva y Ramón Lluís Bande

La mayor parte de les intervenciones afonden n'aspeutos venceyaos a esta rama de la gramática qu'estudia la pronunciación.

Les XXXVIII Xornaes Internacionales d'Estudiu algamen el so ecuador. Imanol Suárez Palma, de la University of Florida, va encargase de la primer conferencia del día, a les 16 hores, sobre ‘La posesión inalienable en las construcciones medias del castellano y el asturiano’.

Darréu, tres un alderique, Alberto Góméz y Lourdes Castro Moutinho van poner dos comunicaciones, la primer d’elles xunto con Rosa Lidia Coimbra sobre’l ‘Estudio de caso de la prosodia en el noroeste de Portugal: aportaciones a un atlas multimedia de las lenguas románicas’. La segunda va tratar de ‘Un estudio de la variación prosódica en mirandés'.

Depués de la posa, a les 18 hores Josefa Dorta, de la Universidad de La Laguna, va dar la conferencia ‘Relaciones de distancia y proximidad prosódica entre el asturiano y el canario: un estudio dialectométrico de las declarativas e interrogativas absolutas’, mentes que va encargase de pesllar la xornada Antonio Romano, de la Università degli Studi di Torino, cola intervención ‘Un modèle d’organisation phylogénétique des données prosodiques asturiennes’.

L'Academia de la Llingua Asturiana (ALLA) entama estes xornaes, con investigadores de dientro y fuera d'Asturies, nel salón d’actos de la Facultá de Filoloxía y Lletres de la Universidá d’Uviéu, nel campus uvieín del Milán. L'accesu ye llibre.

Na semeya, el secretariu de l'ALLA, Xosé Ramón Iglesias Cueva, presenta a Ramón Lluís Bande, responsable de la conferencia inaugural de les XXXVIII Xornaes Internacionales d'Estudiu, entitulada ‘Como una familia esin álbum fotográficu. Una mirada a un cine nacional asturianu posible’.

Contador Estadistiques