Bande va poner la conferencia inaugural de les XXXVIII Xornaes Internacionales d’Estudiu

‘Como una familia esin álbum fotográficu. Una mirada a un cine nacional asturianu posible’ ye’l nome de la conferencia inaugural, a cargu de Ramón Lluís Bande, de les XXXVIII Xornaes Internacionales d’Estudiu qu’entama l’ALLA. Del martes al xueves la Facultá de Filosofía y Lletres de la Universidá d'Uviéu va acoyer ponencies y comunicaciones d’investigadores de dientro y fuera d’Asturies.

La edición d’esti añu va abrise al meudía cola intervención del presidente de l'Academia de la Llingua Asturiana (ALLA), Xosé Antón González Riaño; el vicerrector d’Investigación de la Universidá d’Uviéu, José Ramón Obeso; y el vicedecanu d’Ordenación Académica de la Facultá de Filosofía y Lletres, Juan José García González, pa siguir cola presentación de la edición dixital de ‘Lletres asturianes’, qu’algama’l so númberu 121, y de la revista dixital añal ‘Ciencies. Cartafueyos Asturianos de Ciencia y Teunoloxía’, que suma 9. Darréu, al rodiu de les 13 hores, va ser el turnu del realizador asturianu, que ta acabante d’espublizar el llibru ‘Cuaderno de la revolución’, guión espandíu de la película musical protagonizada por Nacho Vegas ‘Cantares de una revolución’, primer llargu asturianu en participar na seición oficial del Festival Internacional de Cine de Xixón (FICXixón), en concreto na edición del 2018.

La primer xornada va completase con otres dos ponencies, a les 16.30 y a les 19 hores, colos habituales alderiques posteriores: ‘El mito de las lenguas medievales primitivas y la contraargumentación en asturianoleonés’, a cargu de Philipp Obrist, de la Universität Zürich, y ‘La primer traducción del llatín al asturianu: El Fueru de Lleón’, por María Olga Álvarez Huerta, de la Universidá d’Uviéu. Mentes, van poner comunicaciones dende les 17.30 hores Inaciu Galán, Aránzazu Valdés, Carlos Suari y Ataúlfo Gamonal.

La prosodia protagoniza’l miércoles

Imanol Suárez Palma, de la University of Florida, va encargase de la primer conferencia del miércoles, a les 16 hores. Va tratar de ‘La posesión inalienable en las construcciones medias del castellano y el asturiano’, pa siguir la tarde con dos comunicaciones d’Alberto Góméz y Lourdes Castro Moutinho, la primer d’elles xunto con Rosa Lidia Coimbra sobre’l ‘Estudio de caso de la prosodia en el noroeste de Portugal: aportaciones a un atlas multimedia de las lenguas románicas’, y la segunda al respeuto de ‘Un estudio de la variación prosódica en mirandés’.

Van completar la xornada dos ponencies protagonizaes por Josefa Dorta, de la Universidad de La Laguna, y Antonio Romano, de la Università degli Studi di Torino. La primera, a les 18 hores, va tratar sobre les ‘Relaciones de distancia y proximidad prosódica entre el asturiano y el canario: un estudio dialectométrico de las declarativas e interrogativas absolutas’, mentes que la segunda, a les 19, de ‘Un modèle d’organisation phylogénétique des données prosodiques asturiennes’.

El xueves, día caberu d’esta edición de les Xornaes Internacionales d’Estudiu, les conferencies programaes son, a les 16.30 hores, ‘Préstamos en asturiano: estudio morfo-fonológico’, a cargu de Lucia Molinu, de la Université Toulouse II-Jean Jaurès, y, a les 18.45, ‘Refranes meteorológicos del asturleonés en su contexto romance, según los datos de ParemioRom’, por José Enrique Gargallo, de la Universitat de Barcelona. Va poner comunicaciones, dende les 17.30 hores, Gonzalo Llamedo, Xuan Lajo y Claudia Elena Menéndez Fernández.

Toles ponencies, presentaciones y comunicaciones celébrense nel salón d’actos de la Facultá de Filoloxía y Lletres de la Universidá d’Uviéu, nel campus del Milán, y son d’accesu llibre. Les persones que se matricularen qu’asistan a les mesmes van recibir un certificáu acreitativu.

Na semeya, Bande nun momentu del actu de presentación de 'Cuaderno de una revolución', xunto col direutor del FICXixón Alejandro Díaz Castaño, na llibrería xixonesa La Buena Letra'l 17 d'ochobre.