Iniciativa pol Asturianu reclama “un esfuerciu políticu” pa cumplir col artículu 3.2 de la Constitución

“Queremos facer un llamáu a un trabayu colectivu y con consensu pa llograr la igualdá de drechos de la ciudadanía falen la llingua que falen”, apunta Iniciativa pol Asturianu. La entidá recuerda que “l’únicu mecanismu llegal pa garantizar la llibertá ye la oficialidá de la llingua asturiana”, como marca la Constitución nel artículu 3.2.

42 años depués de que s’aprobara’l testu, Iniciativa pol Asturianu reclamó un “esfuerciu políticu” pa dar esti pasu. “Namás consiguiendo un consensu suficiente, 27 de 45 votos nel Parllamentu asturianu y mayoría nel Congresu de los Diputaos, ye posible consiguir la oficialidá. Esta llexislatura ye’l momentu de que los partíos lideren esta reforma con alcuerdos tresversales y pongan en marcha los preseos llexislativos colos plazos que garanticen mesmo l’alcuerdu que los plazos suficientes, teniendo en cuenta tolos pasos precisos pa ello”, señala.

Asina pide a los partíos “diálogu” y “altura de mires” pa siguir trabayando pol idioma dende les instituciones. “La oficialidá ye una medida constitucional que va aportar igualdá, progresu y llibertá a tolos y toles asturianes”, esplica Iniciativa pol Asturianu.

Como exemplu, pon la intervención del conseyeru de Ciencia, Innovación y Universidá, Borja Sánchez García, na Comisión celebrada’l xueves na Xunta Xeneral, na que confirmó, tres una entruga de Foro, que’l Gobiernu nun tien "mecanismos llegales" pa garantizar el derechu de los estudiantes a usar l’asturianu o gallego-asturiano nos sos trabayos fin de grau o tesis doctorales. “L’únicu mecanismu llegal pa garantizar la llibertá ye la oficialidá de la llingua asturiana”, insiste.

Na imaxe, exemplar de la Constitución española del 1978 que s'exhibe nel Congresu. Semeya con llicencia CC BY-SA 3.0.