Foro entruga sobre la prohibición d'usar l'asturianu en trabayos de fin de grau y tesis

El conseyeru Borja Sánchez García respuende que'l Gobiernu nun tien "mecanismos llegales" pa garantizar l'emplegu del idioma.

Foro llevó ayeri a la Comisión de Ciencia, Innovación y Universidá una entruga sobre "qué actuaciones ta faciendo'l Conseyu de Gobiernu pa garantizar que nengún alumnu de la Universidá d'Uviéu tea impedíu de presentar en llingua asturiana los sos trabayos". La respuesta de Sánchez García foi "anguaño nenguna".

El diputáu Adrián Pumares entiende que'l fechu de que se dean casos na institución, yá sía en trabayos fin de grau, como punxo d'exemplu na so interveción, o tesis doctorales, va contra la Llei d'Usu y Promoción del Bable/Asturianu, l'Estatutu d'Autonomía y los propios estatutos de la Universidá d'Uviéu. Llueu'l conseyeru añadió que "nun esisten mecanismos llegales" pa que'l Gobernu pueda garantizar l'usu del asturianu nesti casu al ser una competencia de la Universidá d'Uviéu y que, revisando la reglamentación, pa poder presentar los trabayos n'asturianu "siempre hai que citalo na memoria que conduz a la verificación del títulu".