Iniciativa pol Asturianu echa a andar esperando sumar “a munchos más asturianos al trabayu pol so idioma”

El sábadu tuvo llugar la presentación pública d’Iniciativa pol Asturianu, organización qu’espera trayer aires nuevos a la reivindicación llingüística. Ún de los oxetivos del coleutivu ye sumar “a munchos más asturianos al trabayu pol so idioma”.
 
Numberosu públicu acudió a la cita na Biblioteca d’Asturies (El Fontán) pa conocer de primer manu’l proyeutu d’Iniciativa pol Asturianu, organización que preparó una gala pa la ocasión. La llocutora de RPA Mariluz Pontón encargóse de la presentación del actu, que tuvo como primer protagonista a la cantante Mariluz Cristóbal Caunedo. Tres l’actuación, tomó la pallabra Inaciu Galán, miembru de la Xunta Promotora de l’asociación y voceru de la mesma xunto con Vítor Suárez, qu’esplicó a los presentes qu’Iniciativa pol Asturianu venía a “pone-y fin a la inmovilidá” esperando sumar a “munchos más asturianos al trabayu pol so idioma”. Galán recordó que “de poco val facer autocrítica si nun mos ponemos en marcha pa cambiar la situación” y faló a lo llargo de la so intervención de la importancia de que tol mundu “dea un pasín pa garantizar el futuru del asturianu”.
 
Siguió a la intervención de Galán la proyeición d’un vidiu promocional del coleutivu y otru protagonizáu por Dark la eMe nel qu’amosaba’l so sofitu a Iniciativa pol Asturianu. Darréu, llegó’l monólogu ‘Les vacaciones’ de l’actor y miembru nel so día de Conceyu Bable, Lluis Antón González que, tres la so actuación, celebró la creación d’Inicitiva pol Asturianu, a la que definió como “perimportante pal futuru del idioma”.
 
Intervenciones
 
Suárez y Itziar Montes abrieron la parte última del actu de presentación esplicando la forma de funcionamientu de l’asociación, los sos puntos básicos y dalgunos de los planes de trabayu, ente los que tán “pequeñes campañes qu’abran espacios nuevos de normalidá pal idioma asturianu”. De siguío, entamaron xubir miembros de dellos sectores de la sociedá pa comentar los problemes y posibles soluciones pal futuru del asturianu na so estaya d’actividá. L’artista y escritor Ánxel Nava, acompañáu del autor de la imaxe corporativa d’Iniciativa pol Asturianu, Alex Ordiales, foi’l primeru en falar, pa llueu dar pasu a los maestros d’asturianu Ana García Peláez y Chechu García. Tamién participaron nel actu Próspero Morán, direutor d’Asturnews y presentador de la TPA, y Xuanxo Mariño, direutor de Radio Sele, en representación de los medios de comunicación asturianos, amás de Xandru González Ramos, Xuan Pandiella y Denis Soria, en nome de la mocedá d’Asturies.
 
Toos xuntos nel escenariu zarraron l’actu con otru videu grabáu nes cais d’Asturies nel que ciudadanos espresen los problemes más graves que vive l’asturianu y piden soluciones, sofitando amás l’apaición d’Iniciativa pol Asturianu. Los presentes desplazáronse depués al chigre L’Esperteyu, onde celebróse una folixa nel que los primeros interesaos formalizaron la so inscripción a Iniciativa pol Asturianu. El coleutivu ufre dos posibilidaes: convertise en sociu miembru o en sociu simpatizante. La primer d’elles ta pensada p’aquelles persones que quieran implicase na organización y tien una cuota mensual de 6 euros –o un pagu añal reducíu–, mentes que la segunda ye pa la xente que namái quiera ser socio, ensin participar nel día a día del coleutivu. Esta modalidá tien un coste de 20 euros añales.
 
Nuna nota de prensa, la organización, que va celebrar un procesu eleutoral a primeros d’añu, calificó la xornada de “ésitu” y recordó “qu’esti ye namás l’entamu d’una etapa de munchu trabayu na que tiene la complicada xera de movilizar a la sociedá asturiana y convencela de la importancia de trabayar pa que l’asturianu tenga futuru”. Otra manera, yá furrula, na so versión de preba, la web del coleutivu.