Iniciativa pol Asturianu cumple 8 años “de trabayu, d’ilusión y d’esfuerciu” pa salvar al idioma

“Intentamos siempres trabayar en pro d’un consensu de la ciudadanía en defensa de la oficialidá, sumando ya integrando a persones de toles sensibilidaes por un bien cultural común como ye l’asturianu”, espresa l’actual presidente, Iván Llera. Iniciativa pol Asturianu celebró’l 29 d’ochobre del 2011 el primer conceyu.

Foi n’Uviéu, nun actu nel qu’Inaciu Galán y Víctor Suárez axuntaben a un grupín de 20 persones pa poner les bases a un proyeutu qu’echaba a andar n’avientu y qu’en 8 años de vida permitió consolidar una imaxe de seriedá al rodiu l’idioma y dar munchos pasos hacia la normalización del idioma en munches estayes. “Va ocho años entamamos una carrera de fondu y a llargu plazu, consiguiendo cada día a día, minutu a minutu, que munches puedan sentise indentificaes col nuesu llabor. Ocho años dempués somos una entidá consolidada nel movimientu de reivindicación llingüística, organizando una montonera d’actos, con presencia pública continua, trabayando de siguío y con una bayura de collaboradores y d’asociaos y d’asociaes que formen el capital más importante d’esta organización”, destaca Llera.

El primer presidente de la entidá sería Galán, que resultaría escoyíu tres un conceyu celebráu en febreru del 2012 y se caltendría nel cargu hasta esti mesmu añu, una vegada escosáu’l periodu máximu de mandatu qu’afiten los estatutos de l’asociación. “Tamos nun día de celebración dempués d’ocho años d’actividá d’Iniciativa pol Asturianu de los que podemos tar arguyosos y arguyoses, tanto dende la entidá como dende la propia sociedá, por tolos cambios que se fixeron nestos años y a los que punximos el nuesu llabor al serviciu de consiguir un mayor consensu na sociedá”, apunta’l agora vocal de Rellaciones Institucionales ya Internacionales.

Mayoría na Xunta Xeneral

“Güei, ocho años más tarde, tenemos nel Parllamentu unes mayoríes mui significatives que nun esistíen entós a favor de la oficialidá y a favor del futuru del asturianu. Consiguimos implicar a muncha xente y a munchos colectivos pa consiguir una organización fuerte que precisamente ye útil pa la sociedá nesi cambiu de mentalidá pa entender a la llingua asturiana como un elementu clave pal futuru d’Asturies”, añade Galán.

Por último, Llera aprovecha esta celebración pa recordar que “n’Iniciativa nun hai llugar pal desánimu, tamos nun momentu bonu pal idioma con una mayoría parllamentaria a favor del asturianu. En tou casu, dende Iniciativa pol Asturianu vamos siguir trabayando pa llograr qu’esa mayoría seya unánime na sociedá”.

Na semeya, xunta direutiva actual d'Iniciativa pol Asturianu.