Iniciativa estudia poner una demanda énte les afirmaciones sobre la so financiación

La Plataforma contra la Cooficialidad, que sigue difundiendo noticies falses p'atacar al asturianu, solicita agora una auditoría de fiscalización a les "organizaciones bablistas".

"Queremos recordar que la nuesa entidá nun solicita nin recibe nenguna ayuda pública dende la so fundación nel añu 2011, polo que recordamos que nos cuasi siete años d’actividá nun recibimos nin un euru de perres públiques en forma d’ayuda, sovención o cualesquier otra forma d’ingresu", apunta Iniciativa pol Asturianu énte'l pidimientu formal fechu ayeri a la Sindicatura de Cuentes pol "grupu venceyáu al partíu d’ultradrecha VOX" al considerar qu'esiste una ausencia de control de los fondos públicos xestionaos poles que denominen "organizaciones bablistas", citando a l'Academia de la Llingua Asturiana, a la Xunta pola Defensa de la Llingua Asturiana y a la propia Iniciativa pol Asturianu. Asina, esti coleutivu respuende que "la nuesa ye una entidá que realiza les sos actividaes como asociación gracies a les aportaciones de los cientos de socios y socies que paguen cada añu les sos cuotes, asina como gracies al llabor de voluntariáu de munches persones que mos ayuden en toles actividaes que facemos" y avisa de que ta estudiando si les afirmaciones de dicha plataforma sobre la procedencia de los sos fondos "pueden constituyir base pa una demanda" al ser "falses a sabiendes, yá que llevamos años dando a conocer nes nuesos perfiles en redes y páxina web que somos una entidá sostenida con un 0 por cientu de fondos públicos, polo que yera conocío por esta entidá que facíen una falsa acusación".

"Estes acusaciones falses son un ataque a la desesperada d’esti grupu contrariu al asturianu y a la cultura d’Asturies nun momentu nel que ven como los consensos sociales y políticos faen irreversible la oficialidá del asturianu, una midida que nun ye más que la igualdá de drechos pa tolos asturianos y asturianes", añaden. Nun ye la primer vegada que la Plataforma contra la Cooficialidad fai por difundir noticies falses que dalgunos medios de comunicación difunden ensin contrastales.