Iniciativa entama agrupaciones llocales

Les trés primeres van ponese en marcha en Xixón, Uviéu y la cuenca'l Nalón.

L'entamu d'agrupación llocales foi la principal decisión tomada pola Xunta Xeneral d'Asociaos d'Iniciativa pol Asturianu celebrada'l sábadu n'Uviéu. D'esta forma, la organización que trabaya pola normalización del idioma pretende ameyorar la so presencia nos conceyos.

Xixón, Uviéu y la cuenca'l Nalón van ser les trés primeres n'echar a andar, cola previsión de qu'esta llista vaya creciendo próximamente. Tamién se decidió entamar planes de trabayu "qu’averen a la sociedá asturiana la situación del idioma y sofiten el nuevu marcu nel que ta l’idioma tres los cambeos que tuvieron llugar esti añu y que ponen la oficialidá más cerca que nunca", amás d'afitar y afondar na xera que tien empezada la entidá como asesora d'empreses y políticos y organizaciones de toles sensibilidaes.

Na xunta, que contó con una bona y activa participación, tamién s'aprobaron los presupuestos. "Consiguimos nestos años afitar la organización de cara al futuru, aportar una forma nueva de trabayu y una cara más amable. Pa 2018 plantegámonos siguir medrando en númberu de socios, en presencia nes cais y en repercusión. Tamos nun momentu nel que cualesquier esfuerciu ye poco", señaló tres la mesma Inaciu Galán, qu'afronta'l so añu últimu como presidente d'Iniciativa pol Asturianu –tal como marquen los estatutos de l'asociación–, al tiempu que fixo un llamáu "a toles persones esmolecíes pola situación del idioma a que se sumen a la organización y collaboren".