Inaciu Llope echó’l piesllu a les xornaes de l’Academia

Les XXIV Xornaes d'Estudiu de l'Academia de la Llingua Asturiana remataron con una conferencia d'Inaciu Llope que baxo'l títulu "Xuegu d'identidaes nel Navia-Eo" trató ún de los temes más d'actualidá na vida cultural asturiana estes selmanes.

Nuna llarga ponencia na que se centró na categorización de los discursos nativos y foriatos sobre la cultura más que na cuestión puramente idiomática, Inaciu Llope partió de la idea de que la Ría del Navia nun ye en realidá nenguna frontera, sorrayando que "dende a mayoría dos achegamentos gallegos á identidá del Navia-Eo, recúrrese a os xa nombraos «elementos obxetivos de cultura» como argumento «científico» unde afincar a galleguidá del territorio y, polo tanto, a súa identidá gallega. Trátase de fer coincidir nel Río Navia todas as fronteiras y isoglosas que supoñan marcas de galleguidá. Son dende isoglosas llingüísticas a elementos folklóricos, etnográficos, hestóricos ou d'organización social" mientres que pal ponente los supuestos elementos culturales que definiríen a esti territoriu del Eo-Navia venceyándolu a Galicia y estremandolu d'Asturies son comunes nos mas de los casos al restu de o a otres zones d'Asturies, al empar qu'en munchos casos estes mesmes formes culturales, dende l'arquitectura a les costumes pasando pela mesma gastronomía, nun tan presentes en grandes zones de Galicia.

El discursu del escritor de Cuideiru estendióse n'esponer les pergrandes contradicciones que ve ente'l discursu que los habitantes de la zona faen de la so cultura y de como perciben la so identidá, que nun ven contradictoria cola so pertenencia a Asturies. Asina nuna parte del so discursu Llope esplicó, partiendo de los datos del estudiu específicu pal Navia-Eo de la Encuesta Sociollingüística de Llera Ramo, que "Os resultaos d'este estudio amostran qu'a llingua, como elemento obxetivo y mensurable, nun xeneróu ningún discurso d'identidá antagónico respecto a Asturias. Al rovés: parez claro qu'as diferencias llingüísticas xeneran actitudes de diferencialidá y son elementos d'afirmación da singuralidá del eonaviego, mesmo col gallego, peró tamén col asturiano"

Asina, mientres los eonaviegos remarcaríen la so individualidá dientro d'Asturies, nes argumentaciones de los investigadores gallegos Llope atalanta que tres d'un supuestu discursu d'alienación de la galleguidá del occidente asturianu, conozse que carecen una gran incapacidá p'asumir el discursu propiu del nativu en cuantes que parten d'un nacionalismu gallegu esencialista que-yos lleva a quereer demostrar de forma indiscutible qu'esa zona ye culturalmente Galicia cuando los fechos hestoricos dicen coses como qu'esa zona nunca foi parte de Galicia dende que tenemos datos. Asina, pa Llope "A persistencia da identificación identitaria de pertenencia a Asturias da comunidá eonaviega nun é un feito continxente que responda nin a un capricho fato del destino, nin a procesos de sustitución cultural nin d'alienación política. Non, é el resultao d'un complexo proceso identitario que medróu hestóricamente y en concurrencia cua etnoxénesis asturiana en xeneral, y que mantén espresióis d'integración nel etnosistema asturiano que son parte constitutiva del sou xeito de tar nel mundo".