Inaciu Iglesias a Cherines: "¿Pa ser de dereches hai que ser castellanu? Vamos mal"

Siguen les reaiciones contra’l vetu n’asturianu nes comisiones  dela Xunta Xeneral promovíu pol PP y apoyáu por PSOE, Ciudadanos y Foro.

Una de les más destacaes de los últimos díes foi la d’Inaciu Iglesias, conceyal de Foro en Noreña, empresariu, escritor y editor.

Inaciu Iglesias tien un papel destacáu na estructura de Foro Asturias y postulóse nes primaries internes de la organización como candidatu al Congresu de los diputaos, anque finalmente’l candidatu escoyíu foi Isidro Martínez Oblanca.

Iglesias contestó darréu a la publicación de Mercedes Fernández na que facía ostentación del vetu al asturianu y facíalo cola frase “¿Esto ye la derecha asturiana renovada? ¿Pa ser de dereches hai que ser castellanu? Mal. Vamos mal, mui mal”.

Depués, na so cuenta pública de Facebook, enxertaba una entrada na qu’espresaba’l so malcontentu cola decisión porque “ye una contradicción (porque va siguir usándose)” y tamién afirmaba que “tamién ye una illegalidá (porque va en contra de la Constitución) y una falacia”.

Amás Iglesias llamentaba qu’esta decisión “afonda na concepción del términu ‘derecha asturiana’ como un oxímoron”.

Pa cabu, el conceyal de Noreña facía una declaración d’intenciones esplícita: “Soi tolerante, soi demócrata, soi lliberal y soi asturianu. Y nun veo contradicción nenguna en too ello”.

Na semeya Inaciu Iglesias en L'Arribada 2009