Illa nun modifica la so posición sobre’l confinamientu domiciliariu na xunta billateral con Asturies

El conseyeru de Salú, Pablo Ignacio Fernández Muñiz, respresentó a Asturies na xunta billateral col ministru de Sanidá, Salvador Illa, celebrada na mañana d’esti martes tres el pidimientu d’Adrián Barbón d’establecer un confinamientu domiciliariu nel país per 15 díes pa tratar de controlar la pandemia de COVID-19. El catalán nun cambió la postura amosada’l llunes nuna conferencia.

Nel alcuentru telemáticu, nel que taben tamién presentes los sos respeutivos equipos de trabayu, Fernández Muñiz esplicó les midíes nueves adoptaes n’Asturies p’amenorgar la incidencia de la COVID-19. Mentes, Illa ratificó la so postura de dar un tiempu pa evaluar los efeutos de diches midíes y comprobar la so eficacia enantes de tomar decisiones más restrictives, según informaron dende la Conseyería de Salú.

El Ministeriu de Sanidá refuga asina’l pidimientu del presidente Barbón pa establecer un confinamientu domiciliariu per 15 díes como midida más afayadiza p'amenorgar la incidencia de COVID-19 y torgar el colapsu del sistema sanitariu, pa lo que necesita’l preste de Madrid al nun tener competencies pa ello. Como contraprestación, Illa comprometióse a celebrar una xunta billateral nueva de siguimientu en feches próximes pa evaluar la evolución de la pandemia n’Asturies.

Na semeya, Fernández Muñiz na xunta billateral.