Grau súmase a los conceyos que demanden la oficialidá y prepara l’aprobación de la ordenanza

El Plenu de Grau aprobó ayeri ensin nengún votu en contra la moción na que sofita la oficialidá del asturianu, convirtiéndose nel undécimu conceyu del país que da esti pasu. El gobiernu d'IX cuenta con sacar alantre nunos meses la ordenanza d’asturianu.

El documentu presentáu en Grau sigue la llinia de los aprobaos n’otros conceyos, amosando nun primer puntu’l sofitu del Conceyu a la oficialidá y instando, nel segundu, al Gobiernu y a la Xunta Xeneral l’entamu d’un procesu de reforma del Estatutu pa incluyila. Nel casu de la moción moscona, sí incorpora’l matiz “nesta llexislatura”.

Tres un alderique, nel que’l PSOE amosó una postura favoratible al asturianu y nel que les úniques pallabres contraries hacia l’idioma vinieron del bancu de los trés conceyales non adscritos, ex del Partido Popular (PP), efeutuóse la votación, que salió alantre con 12 votos a favor (los 9 d’IX y los 3 socialistes) y 3 astenciones. La conceyala de Foro nun asistió al Plenu.

“Tamos mui contentos. Esto sólo ye’l primer pasu”, asegura Plácido Rodríguez Fernández, conceyal de Seguridá Ciudadana, Cultura, Desarrollo Llocal y Comunicación, en referencia a la ordenanza d’asturianu, yá preparada y pendiente d’aprobación, pasu que ta siendo retrasáu polos plazos qu’afita la Llei d’Alministraciones. L’edil, que valoró positivamente la posición del PSOE con respeuto al idioma, cree qu’estes dos cuestiones, amás de la creación recién del serviciu de normalización llingüística conxuntu con Candamu, amuesa que “la llingua asturiana tira p’alantre en Grau”.

Once conceyos

L’aprobación d’esta moción en Grau convierte al conceyu moscón nel undécimu que da esti pasu. La llista ta conformada por Mieres, Xixón, Uviéu, Avilés, Noreña, Ḷḷena, Castrillón, Llaviana y Villaviciosa, amás de Bimenes, qu’oficializó l’asturianu nel 2016.