González Riaño y el so equipu renueven mandatu al frente de l’ALLA

La direición actual de l’Academia de la Llingua Asturiana (ALLA) va siguir cuatro años más al frente de la institución académica. El presidente Xosé Antón González Riaño y el so equipó salió reelixíu por unanimidá nel procesu celebráu en xunta estraordinaria esti xueves.

En xunu del 2017 l’entós vicepresidente pasó a ocupar la presidencia en sustitución d’Ana María Cano, qu’acumulaba cuatro mandatos y decidió nun presentase a la renovación de cargos. Namái siguía l’ayalgueru, Carlos Lastra, incorporándose como vicepresidenta Marta Mori, Xosé Ramón Iglesias Cuevas como secretariu y Carme Muñiz Chacón como vicesecretaria.

Cuatro años depués, González Riaño y tol so equipu recibía la confianza, por unanimidá, de tolos académicos de númberu pa dar continuidá a lo fecho nesti tiempu. Dende la direición apunten que’l so enfotu pal periodu que va hasta’l 2025 ye “siguir col llabor desendolcáu hasta agora nos ámbitos sociales y de normativización del idioma”, al empar que trabayar “fondamente por siguir nuna xera qu’ha empobinar, ensin dulda, hacia’l llogru de la oficialidá de la llingua hestórica de tolos asturianos y asturianes”.