González-Quevedo lleva la so poesía a Candás

Participa na estaya 'Poétiques' del Programa Cultural Antón de Marirreguera.

Roberto González-Quevedo protagoniza la segunda sesión d'esti ciclu que tien l'oxetivu de "dar conocer la poesía que se fai anguaño n’asturianu", amosando la poética d'autores en llingua asturiana na propia boca de los escritores, inauguráu'l pasáu 18 de xineru por Xurde Fernández. Nesta ocasión, l'autor de Palacios del Sil va ser presentáu por Esther García, mientres que la Escuela de Música Miguel Barrosa va repetir acompañamientu musical.

Con una amplia trayeutoria lliteraria dende que nel 1980 espublizara'l primer de los seis volúmenes de la coleición 'Na nuesa tsingua', en collaboración con Eva González, González-Quevedo va facer un repás a les sos creaciones vieyes y actuales. L'actu va comenzar mañana a les 19.30 hores nel Muséu Antón, con entrada llibre.

Van completar les 'Poétiques' del 'Programa Cultural Antón de Marirreguera, Carreño ñeru de la pluma n'asturianu', qu'entama'l Conceyu de Carreño, les sesiones previstes con Lourdes Álvarez (8 de marzu), Marta Mori (5 d’abril) y Xuan Bello (27 d’abril), a lo qu'hai que sumar una xornada dedicada a los creadores mozos prevista pal 28 d’abril.