García López recibió en Barcia el 'Hórreo de oro'

|
https://asturies.com/noticies/garcia-lopez-recibio-en-barcia-el-horreo-de-oro

L'Asociación Cultural 'El Hórreo' reconoció col so gallardón la trayeutoria de la escritora y la so "defensa de la ḷḷingua asturiana".

"Siéntome mui considerada y valorada por vosotros", espresó María Esther García López al recoyer esti sábadu el 'Hórreo de oro', distinción col qu'esti coleutivu premia "la trayeutoria exemplar d'instituciones y particulares, con un llabor que constituya una aportación relevante en beneficiu de la sociedá". Nel casu concretu de la valdesana, “en reconocencia a la sua siguida y granible actividá ḷḷiteraria; pola sua inestimable y prollongada defensa de la ḷḷingua asturiana y la sua especial contribución la so conocencia y espardimientu de la mesma; y por representar una de les voces más relevantes y destacadas dientro de la ḷḷiteratura n'asturianu”.

Depués de dedicar esti emotivu momentu al so hermanu José Ramón, fináu en marzu, recordó la so participación nel prólogu de la espublización de l'asociación cuando catalogó tolos horros de Barcia y apuntó que'l 'Horreo de oro' pa ella "ye un arguyu, y foi una sorpresa; y sobre too ye dalgo mui emotivo que contribuye a reforzar los llazos cola tierra que me vio nacer". Rescampló la importancia d'esti patrimoniu, "iconu d'Asturies", y fixo memoria de la so infancia y del horru familiar.

 

Contador Estadistiques