Galán lleva'l XIII Concurso de Monólogos Pepe Campo

El sábadu comienza la X Semana Cultural Joaquín Rodríguez Muñiz qu'entama la Sociedá Humanitarios de Samartín.

La entrega del premiu del XIII Concurso de Monólogos Pepe Campo ta enmarcada nesta celebración que tien como sede Morea y qu'organiza per siete díes delles actividaes na villa. El periodista y escritor Inaciu Galán resultó ganador per quinta ocasión d'esti certame col so monólogu 'Les coses de la política nueva', que va interpretar l'actor Lluis Antón Gonzalez el llunes a les 19.30 hores nel Centru Cultural de Morea mientres l'actu.

Galán esplicó al conocer la noticia que "pa min ye un honor recibir otra vegada esti premiu y fáigolo cola mesma ilusión que’l primeru. Préstame ver que’l premiu sigue recibiendo munchos orixinales cada añu y que’l xéneru del monólogu sigue vivu y tien cuerda pa llargo, porque ye una parte importante de la tradición lliteraria y teatral de la cultura asturiana y una ferramienta que sirvió pa la tresmisión del nuesu idioma en momento perdifíciles”. Sobre’l monólogu col que ganó cunta que "el testu xira alredor de la situación que se vive anguaño na política, colos partíos nuevos y les situaciones que se tán dando, un testu mui d’actualidá a pocos díes de les elecciones”.

El Premiu recuerda la figura del escritor ayerán Pepe Campo, que dexó a la so muerte en 1992 una llarga obra de monólogos y poesíes de calter popular. El xuráu del premiu tuvo conformáu pol miembru de l’Academia de la Llingua Asturiana, Pablo Xuan Manzano, l’escritor Ánxel Álvarez Llano y el músicu Octavio Trapiello.

Charra d'Ambás

Entes les actividaes previstes pa esta selmana en Morea destaca la charra 'Novedaes recoyíes pol archivu la tradición oral d'Amás nos últimos 10 años', a cargu del propiu Xosé Antón Fernández, que va celebrase na Casa Cultura'l miércoles a les 19.30 hores. Mentes, el martes nel mesmu llugar y a la mesma hora, Alfonso Fernández, direutor del Muséu de la Gaita va dar la conferencia 'La gaita asturiana: construyendo una entidad'.

Otra manera, la Sociedá Humanitarios de Samartín va entregar el vienres nel Teatru Cine Carmen (20 hores) los sos novenos gallardones. La 'Colmena de Oro a la Solidaridad' va pa la Cocina Económica d'Uviéu; la 'Espiga de Oro a la Tradición', al llaniscu José Antonio Anca 'Toño'; y la 'Medalla Honorífica', a la Escuela de Trial del Moto Club Cuenca Minera de Aller.