Finó Celestina Ca Sanchu, fonte esencial de la tradición oral asturiana

Los sos cantares queden inmortalizaos en dos discos, ún d'ellos grabáu xunto col so nietu Xosé Antón Fernández 'Ambás'.

Celestina Ca Sanchu finó esti sábadu a los 98 años, una perda murnia pa la cultura asturiana. La 'bulita' del músicu y investigador, que cuenta con un importante archivu de tradición oral, foi una de les persones que más contribuyeron al mesmu con cantares que queden rexistraos pa la posteridá, evitándose asina l'escaecimientu al que taríen condenaos.

El primer discu de Celestina Sánchez Fernández foi l'espublizáu pol Muséu del Pueblu d'Asturies nel 2007. Nueve años depués, Xosé Ambás grabaría otru de nome 'Bulita' con cantares tradicionales que, daquella con 94 años, foi recordando.

La especial rellación col so nietu, el so saber y la so hospitalidá convirtieron a esta vecina d'Ambás nun símbolu de la tresmisión del patrimoniu cultural asturianu. Por esti motivu, Iniciativa pol Asturianu, tres conocer la noticia de la so muerte, pidió que se reconoza'l so llabor de forma póstuma con una Medaya d'Asturies.

N'Asturies.com llamentamos fondamente la so perda y compartimos el videu últimu que xubió Xosé Ambás, nel mes de marzu mientres el confinamientu que nun-y permitía dir a vela, na so canal de YouTube con un cantar de la so 'bulita'.