Fina la moza n'estáu críticu pol accidente nel corredor del Narcea

Otros dos ocupantes del coche perdieran la vida'l domingu nel momentu del siniestru.

Elsa Lorences, de Tinéu al igual que Sergio Menéndez, víctima tamién del accidente, finó esta mañana nel HUCA, onde foi treslladada n'helicópteru medicalizáu con un traumatismu craneoencefálicu severu, día y mediu depués del choque ente dos automóviles na AS-15, na cercanía de San Pedru de Courias. La tercera persona que perdió la vida nel accidente ye otra moza, Tania Fernández, residente nel barriu xixonés de La Calzada.

Tinéu decretara trés díes de lutu pola muerte de Menéndez que, xunto con otros cuatro amigos, se dirixíen a Cangas del Narcea a les Fiestes del Carme y La Madalena. Nel casu de Fernández, desplazábase a la villa pa trabayar mientres la Descarga nuna discoteca.