Fernández Villa acude al Xulgáu pa sometese a un esame médicu

El miércoles comienza’l xuiciu pola apropiación indebida de 434.158 euros del SOMA-UXT qu’enfrenta José Ángel Fernández Villa. El ex secretariu xeneral del sindicatu mineru pasó un esame médicu nel Xulgáu pa decretar si ta en condiciones de declarar.

La defensa de Fernández Villa pidiera la suspensión del xuiciu por una supuesta enfermedá mental sobrevenida que los forenses de la clínica de los Xulgaos d’Uviéu evaluaron esta mañana. El miércoles van declarar na Audiencia na primer sesión de les cinco prevista pa tratar l’apropiación indebida de dineru del SOMA-UXT ente'l 1989 y 2012 pol que la Fiscalía pide 5 años al líder mineru, y 3 años y 6 meses a Pedro Castillejo, ex secretariu de la Fundación Infide, nesti casu por 119.434 euros.

Acompañáu de la so muyer y la so abogada, y con pasu curtiu y sele, el de Tiuya llegó al edificiu xudicial esta mañana col rostru cubiertu por unes gafes de sol. De nun tener el vistu bonu de los médicos ha d’acudir a declarar al xuiciu que comienza’l miércoles y que va constar hasta’l 5 de xunetu de seis sesiones.