Fernández Bartolomé va pasar al grupu mestu de la Xunta Xeneral

Esta cuestión va tratase nel próximu aconceyamientu de la Mesa y de la Xunta de Voceros llueu de la oficialización de la espulsión del diputáu del de Ciudadanos.

Luis Armando Fernández Bartólome, que fora suspendíu de militancia n'abril de manera tempora, agora confirmada, va siguir de diputáu fuera del grupu parllamentariu naranxa. La so intención de nun abandonar l'escañu y llevar l'asuntu a la xusticia ordinaria va obligar a la constitución del grupu mestu na Xunta Xeneral, esta llexislatura inesistente pola decisión de rebaxar de 3 a 2 el númberu de diputaos mínimos pa formar grupu, favoreciendo asina a Asturies pela Izquierda (IX-IAS) y, de pasu, a VOX.

Al meudía de mañana va aconceyar la Mesa de la Cámara y darréu, la Xunta de Voceros, onde se va trata la situación nueva y los cambios que va conllevar nel funcionamientu de la Xunta Xeneral y nes asignaciones. El diputáu xixonés, llueu de conocer la decisión del so grupu parllamentariu, col que yá nun tenía comunicación, espresó que lu echen por esixir tresperencia y defender los valores del partíu y el programa eleutoral.