Fernández asegura qu’España, “pa ser xusta y equilibrada, ha de coneutar Castilla y Lleón, Galicia y Asturies col Corredor Atlánticu”

|
Fernández asegura qu’España, “pa ser xusta y equilibrada, ha de coneutar Castilla y Lleón, Galicia y Asturies col Corredor Atlánticu”

Asturies, Castilla y Lleón, y Galicia tornaron a amosar una imaxe de xunidá, nesta ocasión en Madrid, en defensa del Corredor Atlánticu. Los trés presidentes participaron nel Fórum Europa y Javier Fernández aseguró que pa una España “xusta y equilibrada” les trés comunidaes autónomes han de tar coneutaes al mesmu.

“Güei equí en Madrid, como enantes en Santiago, queremos celebrar una triple bona noticia. La cooperación ente gobiernos autonómicos, la participación de la sociedá civil y el compromisu del Ministeriu de Fomentu pa facer realidá la nuesa reivindicación sobre’l Corredor Atlánticu, porque ye necesariu, porque ye de xusticia y porque ayudará a construyir una España más equilibrada y más competitiva nesi cuadrante del Noroeste que, sólo a estos efeutos, constitúi una rexón nueva”, afirmó’l presidente del Gobiernu na xornada ‘Corredor atlántico: la hora del noroeste de España’ qu’entamó esta mañana Nueva Economía Fórum. Xunto a él foron protagonistes los populares Alberto Núñez Feijóo y Juan Vicente Herrera, dirixentes de Galicia y Castilla y Lleón, de manera respeutiva.

El socialista, que tuvo acompañáu en Madrid pol conseyeru de Presidencia y Participación Ciudadano, Guillermo Martínez Suárez, y pol d’Infraestructures, Ordenación del Territoriu y Mediambientu, Fernando Lastra, tamién demandó una “España plenamente protagonista n’Europa; la España que, pa ser xusta y equilibrada, debe conectar Castilla y Lleón, Galicia y Asturies col Corredor Atlánticu”. Enantes destacara la xunión ente estes trés comunidaes pola “necesidá” ente la problemática “de les nueses debilidaes comunes na demografía, nes infraestructures de comunicación o nel sistema de financiación”.

“Pa espresalo con otres pallabres: átanos la cercanía, la vecindá xeográfica, los ríos que nos crucien y los cordales que nos separten, pero nos xune la conveniencia d’alianos pa superar les mesmas debilidaes”, siguió’l socialista.

Mesma importancia que’l Mediterraneu

Herrera reclamó pal Corredor Atlánticu la mesma importante que se-y ta dando al Mediterraneu al consideralu un “proyeutu d’Estáu”. “Trátase d’una oportunidá grande de desarrollu, crecimientu y emplegu pal conxuntu d’España que debemos saber aprovechar”, apuntó.

Núñez Feijóo, pela so parte, aseguró que “España ye muncho más que la ponte aérea Madrid-Barcelona” y calificó la reclamación de les trés comunidaes autónomes del Noroeste como “xusta”. Na so intervención refugó que se privilexen dende l’Estáu inversiones territoriales pa evitar reclamaciones rupturistes de les formaciones independentistes, nuna alusión nidia a Catalunya.

Na imaxe, Fernández, Núñez Feijóo y Herrera. Semeya obra d'Armando Álvarez.

Contador Estadistiques