Asturies, Galicia, y Castilla y Lleón xúnense pa finar col aislamientu históricu del noroeste

Santiago de Compostela acoyó esti llunes l’Alcuentru pal Impulsu del Corredor Atlánticu Noroeste, nel que participó Galicia, Asturies, y Castilla y Lleón. El Plan d’Estratexa Loxística y Ferroviaria que presentaron los presidentes d’estes comunidaes cuantifica una inversión de 3.100 millones nel periodu 2021-2030.

Los populares Alberto Núñez Feijóo y Juan Vicente Herrera, y el socialista Javier Fernández, dieron una imaxe de xunidá pa finar col aislamientu históricu que sufre’l noroeste del Estáu. Los presidentes de Galicia, Castilla y Lleón, y Asturies, de manera respeutiva, confirmaron l’allianza qu’echó a andar nel 2017 que busca defender l’impulsu del corredor atlánticu de mercancíes y la incorporación del noroeste penisular al mesmu, pendiente de confirmación pola Xunión Europea.

El plan presentáu esta mañana, diseñáu pol inxenieru Alfredo Irisarri, cuantifica una inversión necesaria de 3.100 millones nel periodu 2021-2030, que tendría financiación europea. Ésti consta de propuestes d’actuación p’ameyorar l’estáu de les víes y trazaos y la conexón colos puertos y el restu de la rede, asina como l’ampliación de terminales.

“N’España esiste dende hai décades un riesgu de descompensación territorial na rede d’infraestructures, achacable a delles causes, como’l poderíu económicu del área mediterránea. Nun creo que naidie que ponga la vista sobre’l mapa de les comunicaciones n’España cuestione la necesidá d’esconxurar esi peligru. La conexión col corredor atlánticu (y de los puertos atlánticos y cantábricos ente sí) ye una de les meyores maneres de facelo”, aseguró Fernández na so intervención.

Na semeya, Fernández, Núñez Feijóo y Herrera.