Felpeyu va dar un conciertu especial en Xixón pol so 25 aniversariu

|
Felpeyu va dar un conciertu especial en Xixón pol so 25 aniversariu

Esti branu Xixón va acoyer un conciertu especial de Felpeyu con motivu del so 25 aniversariu, con sorpreses y la participación d’antiguos componentes. El grupu yá tien grabao ‘Cerquina’ que va sacar en CD y, como novedá, en vinilu, pa lo que tien en marcha una cuestación popular na rede que lleva un gran ritmu d'apoyos.

Felpeyu cumplió los 25 años de trayeutoria musical n’ochobre, pero va treslladar les celebraciones principales por estes dos décades y media de folk a esti 2017. El primer pasu ye la grabación yá finada de ‘Cerquina’, que va tar disponible nes tiendes “a primeros de xunetu seguramente”, apunta Ruma Barbero, a lo que va siguir una xira que va contar con “un conciertu grande en Xixón” nuna fecha que la banda va anunciar nes próximes selmanes.

Nél tán previstes delles sorpreses y la participación d’antiguos componentes. Sicasí, nun va ser el conciertu de presentación de ‘Cerquina’, que se celebrará enantes del previstu en Xixón.

Seis temes cantaos y seis instrumentales

‘Cerquina’ ye un discu grabáu nos Estudios 15:40, col propiu cantante Senén Fernández como téunico de grabación, que va tar compuestu por doce temes: seis cantaes escrites pola banda y por Boni Pérez, y seis instrumentales que “faen un percorríu polos ritmos más comunes de la tradición asturiana: pasucáis, muñeires, saltones, xotes, dances y alboraes”, espliquen dende la banda. La mecedura y masterización corrió a cargu de Sergio Rodríguez en Tutu Estudios, mientes que’l percusionista Ruma Barbero encargóse del diseñu gráficu del discu y Xurde A. Cachero, de les semeyes.

El sestu trabayu de la banda va editase en CD y, per primer vegada, en vinilu. “Nunca nun fiximos un vinilu y yera dalgo que nos prestaba facer”, apunta Barbero, que recuerda que’l primer discu de Felpeyu foi tamién el primeru de Fonosatur que nun se sacó nesti formatu. Dao’l desconocimientu de la posible demanda del mesmu, Felpeyu decició entamar una cuestación popular na rede al traviés de Verkami, iniciativa que ta siendo un ésitu, yá qu’en seis díes lleva recaudao más de la metá de los 4.000 euros que se necesiten pa encargar una tirada a fábrica: 2.022 euros.

“Paez qu’a la xente-y apatez tener el discu en formatu vinilu”, destaca Barbero, qu’apunta qu’ente los pidíos recibíos hasta la fecha “hai dellos de fuera de la Xunión Europea”. Felpeyu ye ún de los grupos más internacionales del país, con actuaciones nestos 25 años per toda Europa, Canadá, Líbanu y, inclusive, trés xires per Australia.

Contador Estadistiques