Feble selmana nes bolses

Los inversores nun arriesguen y les duldes económiques nun ayuden a facer d´esti mes d´ochobre un mes p'afitar les ganancies del añu. La selmana pasada los mercaos bursátiles aselaron y munchos nun tuvieron nin tendencia definida. Al final de la selmana es bolses tornaron a les perdes y el vienres los mercaos trancaron en negativo.



Los bonos datos estadísticos espublizaos al otru lláu del Atlánticu nun foron pa emburriar unos mercaos ensin perres y con munchu mieu a un mes d´ochobre históricamente peligrosu, anque de momentu apurre bonos datos, casu del índiz de confianza de la Universidá de Michigan o el de xorrecimientu de nueves viviendes entamaes qu'algamó les 1.888.000 cuando los analistes contaben con llegar solo a 1.830. Si caltener se caltién esta tendencia la recuperanza de la primer economía sedrá un fechu. Amás comenten dellos economistes que´l PIB del tercer trimestre nos Estaos Xuníos pue llegar al 5,5%, mui penriba de lo que se contaba. Sicasí, esta información nun llegó a les bolses, con permalos resultaos de les tecnolóxiques que nun-yos prestaron a los inversores. El vienres les bolses de Novayor marcaron númberos encarnaos, col Dow Jones industrial en cayida del 0,71% y el tecnolóxicu Nasdaq cayendo'l 0,36%. Los grandes perdedores foron eBay, Broadcom, XL Capital, Gateway y Sprint y sobremanera Sun Microsystems. L´anuncia d´un beneficiu mui moderáu de la casa de subastes per Internet eBay nun convenció a dellos analistes que s'enfotaben nunos beneficios esaxeraos.



Mientres, na Xunión Europea la economía nun ta pa dar blincos, con una cayida de la producción industrial del 0,4%. Les bolses europees tuvieron una feble selmana marcada pol mieu de los inversores al futuru a curtiu plazu, y el vienres trancaron en negativo los principales parqués del continente. Francfort foi una de les places onde los grandes valores tuvieron les mayores cayíes coles perdes de Siemens o del Deustche Bank.

Nel parqué madrilanu, el baxu volume de negociu y el pieslle negativu de los futuros y les opciones tiraron p´abaxo d´un mercáu que yá dende´l entamu d´esti mes nun dió señes de recuperanza. La influyencia de Wall Street emburrió más al Ibex, que perdió otra vegada la referencia psicolóxica de los 7.000 puntos, baxando'l vienres un 0,58% hasta los 6.993,60 puntos. Nel conxuntu de la selmana l´Ibex caltuvo una tendencia plana dende´l puntu de vista técnicu. La Bolsa de Madrid marcó un índiz xeneral de 742,81 puntos mentantu que´l tecnolóxicu Nuevu Mercáu tuvo una perda del 1,67% hasta los 1.781,10 puntos. Nel tarrén de les perdes destacaron Indra, Amadeus, Iberdrola, Sogecable, Inditex y REE. Los valores que trancaron en positivo foron Iberia, Arcelor, Vallehermoso-Sacyr y Corporación Mapfre . El sector bancariu nun tuvo una bona selmana, y el Grupu telefónica aguantó ensin ximielgase.

El preciu de barril de Brent paró la xuba llibre y aposentó nos 29,21 dólares. Nel mercáu de divises l´euru sigue con fuercia y la esta selmana marcó 1,1640 dólares. La materia prima más preciada, l´oru, ya se cotiza a 370 dólares onza. Otramiente, el mercaú de renta fixo tuvo una selmana a la baxa. Anguaño la rentabilidá de los bonos europeos s´asitia alrodiu el 4,3%.