Extremadura, rival de la seleición asturiana UEFA na segunda fase

Los estremeños eliminaron a la Comunitat Valenciana y Galicia, mentes qu'Asturies superó a la Comunidad de Madrid y Melilla.

El trunfu ayeri contra Melilla (1-0) con tantu d'otru xugador del CD Tuilla, el central Trabanco –Villa marcara los dos de la victoria cola Comunidad de Madrid el vienres–, permitió a Asturies pasar a la segunda fase de la X Copa de les Rexones de la UEFA con plenu de seis puntos. El sábadu, los melillenses ganaren a los madrilanos por 2-0, polo que'l choque del Suárez Puerta resultó a la fin clave.

Los homes de Xiel sabíen que diben disputar la previa a la fase final col ganador del grupu B, que resultó ser Extremadura. Los estremeños ganaron nel so primer partíu a la Comunitat Valenciana por 2-1, mesmu resultáu que rexistraron énte Galicia. Extremadura va contar col factor campu nuna eliminatoria a doble vuelta qu'ha de celebrase enantes de que fine febreru.

Castilla y Lleón y Castilla-La Mancha, clasificaes pa la fase final

La otra eliminatoria pa consiguir plaza pa la fase final, na que van participar cuatro seleiciones ente'l 25 y 27 de marzu, va enfrentar a Andalucía con Ceuta. Mentes, Castilla y Lleón y Castilla-La Mancha yá tán clasificaes al quedar exentos los ganadores del so grupu nel sortéu fechu al aniciu de la competición. El campeón estatal disputará la fase europea colos vencedores d'otres federaciones afiliaes a la UEFA.