Espertos en Patrimoniu Industrial piden que se caltengan antigües industries asturianes

El congresu del Comité Internacional pa la Salvaguarda del Patrimoniu Industrial TICCIH-España, estaya española d'esti comité internacional collaborador de la UNESCO y con presencia en más de 50 países, aconceyó'l 21 de setiembre en Xixón, onde celebró'l seminariu 'Patrimoniu industrial: llugares en peligru'.

Nel seminariu ellaboróse un informe ne que se conseñen los edificios y instalaciones más importantes a caltener pol so valir históricu y estéticu de tola herencia del patrimoniu industrial nes distintes comunidaes autónomes del estáu, ente ellos dellos asturianos. La mina de Solvay en Lieres, una esplotación con aniciu nel añu 1902 en conceyu Siero y que ta afectada anguaño por nuevos usos industriales que nun espeyen el caltenimientu de los edificios históricos, ello con tar el conxuntu defendíu en parte pola Llei de Patrimoniu Cultural del 2001 del Principáu d'Asturies, abre una llista de reclamaciones na que tamién figuren les instalaciones d'ENSIDESA n'Avilés, con referencia especial a los gasómetros, chimenees, la central térmica y les naves industriales y en tercer llugar la Fábrica d'Armes de La Vega n'Uviéu, un conxuntu industrial que data del añu 1857, anque tamién se pide que se faiga estensiva la protección a los edificios residenciales pa distintes categoríes llaborales que l'arrodien.