ERC caltién el 'non' a Sánchez, pero percibe voluntá de diálogu per parte del PSOE

La formación catalana nun tien priesa n'avanzar nes negociaciones pa facilitar la investidura del presidente en funciones.

Adriana Lastra, José Luis Ábalos y el secretariu d'Organización del Partit dels Socialistes de Catalunya (PSC), Salvador Illa, conformaron l'equipu negociador socialista, mentes que Gabriel Rufián, Marta Vilalta y Josep María Jové, foron los representantes republicanos na primer xunta ente PSOE y ERC pa tratar de desbloquiar la situación política y facilitar un gobiernu de coalición de Pedro Sánchez con Xuníes Podemos. Ésta tuvo un llargor de dos hores y sirvió pa que dambos partíos averaran postures, anque'l 'non' sigue siendo la postura que caltienen los catalanes.

"Foi una primer aproximación na que se pudo constatar la esistencia de diferencies, pero tamién de puntos d'alcuentru y, en too casu, una voluntá compartida de diálogu que permita desencallar la formación de Gobiernu y asegurar la estabilidá política necesaria que permita afrontar: una axenda de derechos sociales, recuperación de derechos civiles y llaborales tarazaos polos gobiernos del Partido Popular, la situación industrial en Catalunya y nel conxuntu d'España, en particular el sector de l'automoción, y encauzar el conflictu políticu en Catalunya dende'l diálogu y l'entendimientu institucional", espresaron PSOE y PSC nun comunicáu conxuntu. Mentes, ERC espublizó otru nel que destaca que "les dos partes afitaron un puntu de partida común en constatar la necesidá d'abordar políticamente un conflictu que ye, esencialmente, de naturaleza política", y recordó que "la solución democrática pa Catalunya pasa per una mesa de negociación que se fundamente en cuatro pegoyos: que sía ente gobiernos, ensin apriorismos nin temes torgaos, con calendariu y con garantíes de cumplimientu".

El próximu alcuentru ente les dos formaciones va ser el martes a les 17 hores.

Na semeya, Vilalta, Rufián, Jové, Illa, Lastra y Ábalos.