Entren en serviciu los accesos al PEPA

Tres trés llustros de trabayos n'Avilés.

La Conseyería d’Infraestructures, Ordenación del Territoriu y Mediu Ambiente abrió esti llunes al tráficu los accesos al Parque Empresarial del Principáu d’Asturies (PEPA) depués d’una inversión de más de 26,5 millones. El conseyeru Benigno Fernández Fano y el d'Industria, Isaac Pola, visitaron ayeri los accesos en compañía de l’alcaldesa, Mariví Monteserín, y otres autoridaes.

Nel actu, reivindicaron la importancia d’una actuación de gran complexidá que resuelve tolos movimientos posibles ente’l PEPA, la N-632 y lo que yera l’autovía AI-81, güei llamada AS-392, en tolos sentíos de circulación. La pasarela d’accesu al PEPA va llevar el nome de Daniel Alonso "en reconocencia a una trayeutoria empresarial carauterizada pol so llabor d’impulsu y modernización de la industria asturiana y el so apueste pola investigación, la innovación, la cualificación del trabayu, la internacionalización comercial y la proteición medioambiental", espliquen dende la conseyería.

Detalles de la obra

L’enllaz del PEPA tien forma de trompeta, con un vial perimetral de doble calzada na vera sureste del parque emprearial, que coneuta cola autovía, la variante d’Avilés y la marxe derecha del puertu. La plataforma de los viales resolvióse con siete grandes estructures de tableros mestos con caxón metálicu y llábana cimera de formigón.

Amás, en dos d’elles, una sobrevolando l’AS-392 y otra de desembarcu nel polígonu, proyeutóse un tableru doble por mor de que s’asitien nel ramal principal d’accesu al PEPA, de sentíu doble. Estos elementos sumen un costu de 17 millones, un 64 por cientu del presupuestu total de les obres.

La integración correuta de les obres nel mediu ambiente llogróse coles midíes correutores d’impautu ambiental oportunes, como la hidrosema de turries de desmonte y terremplén, cubriendo una superficie de más de 25.000 metros cuadraos y el plantíu d’arbustos. Tamién s’instalaron 2.000 metros de pantalles anti-ruíu.