Entrambasauguas, la revista qu'afonda na identidá del Navia-Eo

La secretaría llingüística del Navia-Eo de l'Academia de la Llingua Asturiana asoleyó estos díes un nuevu númberu de la revista "Entrambasauguas" nel que pue alcontrase una bona riestra d'artículos sobre la historia, el paisaxe, costumes y persones d'esta tierra del occidente astur.

Los titulares de los artículos inxertos nesti númberu 22 de la revista del Navia-eo llamen l'atención a la llectura. Títulos como "A ruta del estraperlo" col que Rafael Cascudo Noceda convida al llector a facer un recorríu andariegu pente A Veiga y Abres o "Nas Figueiras somos mundiales" nel que Moncho Martínez Castro reconstrúi la historia d'ún de los xalés modernistes d'indianos más importantes d'As Figueiras a cuentu de la so apaición en periódicu americanu "New York Times" son delles de les prestoses sorpreses que s'asomen peles 35 páxines d'esta revista trimestral escrita en gallego - asturianu. D'otra manera, "Entramabasauguas" convídanos tamién nesti númberu 22 a conocer "Casa Lidia" ún de los chigres - tienda más tradicionales de Castropol o a afondar nes vides del "fareiro" Servando Méndez y de Santiago Pérez, que desertó del llamáu a files na Guerra Civil y que tuvo presu e campu de prisioneros d'Arnao n'acabando la Guerra. Tamién hai collaboraciones lliteraries d'Aurora García Rivas, Manuel García - Galano o Emma Méndez, amás d'un artículu d'opinión de Xosé Antón González Riaño sobre les tensiones ente Galicia y Asturies y la sección d'axenda con actos culturales y sociales y les novedaes nes llibreríes rellacionaes col Navia-Eo.