Entamó’l llabor de la Xunta de Toponimia

Dos años dempués d'espublizase en Boletín Oficial del Principáu'l documentu que-y daba forma llegal y seyes años dempués d'aprebase la Llei d'Usu del Asturianu que l'afitaba como instrumentu de necesaria creación, la Xunta de Toponimia del Principáu d'Asturies celebró ayeri la so primera reunión, na que l'oxetivu nun yera otru que'l d'apautar el protocolu de funcionamientu y oxetivos xenerales de la Xunta, más que'l d'entamar a metese en fondures toponímiques.

Carlos Madera, Director Xeneral de Promoción Cultural, ye'l presidente d'esta primer Xunta de Toponimia, qu'igüen el director d'Ordenación del Territoriu José Javier Izquierdo como vicepresidente y un garapiellu de vocales en representación d'Ana Cano en representación de l'Academia de la Llingua, el caderalgu d'historia medieval Francisco Fernández Conde en representación de la Universidá d'Uviéu, Valentín Ruiz pola Axencia de Cooperación Local, Xulio Viejo y Fernando Álvarez Balbuena en calidá d'espertos designaos pola Conseyería y Josefina Martínez Álvarez en representación del Real Institutu d'Estudios Asturianos. La profesora de la Facultá de Filoloxía, polémica poles sos opiniones sobre l'asturianu, nun asistió a esti primer aconceyamientu.

El Director de la Oficina de Política Llingüística Ramón d'Andrés y el Director Xeneral de Promoción Cultural Carlos Madera dieron n'acabando la primer reunión de la Xunta una rueda de prensa na que calificaron como "mui bonu" l'ambiente de trabayu d'esti primer aconceyamientu y esplicaron los oxetivos, métodos y preseos colos que cuenta esta Xunta de Toponimia acabante de crear. Ramón d'Andrés esplicó que la Xunta va trabayar col llibru "Nomes de Conceyos, parroquies y llugares" editáu pola Academia de la Llingua como ferramienta básica sobre la que los componentes del conseyu van poder facer les aportaciones y alegaciones que camienten precises, anque dende llueu'l llabor de la Xunta nun va acabar "nel repasu" a esti material y a los estudios específicos asoleyaos pola ALLA nestos años.

Les autoridaes asumen que'llabor parte con retrasu, y entienden qu'hai que trabayar teniendo en mente'l plazu que marca la llexislatura en cursu. Nesti sentíu d'Andrés y Madera destacaron que se trabaya cola idea clara de tener afitada tola toponimia oficial pal añu 2.007. El procedimientu que va siguise va ser el de pasar los llistaos de topónimos primero peles corporaciones municipales y llevalos dempués hasta Xunta de Gobiernu del Principáu pa que los aprebe definitivamente. D'Andrés señaló qu'aquellos conceyos que yá se punxeron en contactu col so departamentu sobre esti asuntu van ser pelos que primero s'entame a trabayar, anque evitó nomar cuálos son estos conceyos.

Pa la Xunta de Toponimia, la correcha denominación de los conceyos ye más qu'un asuntu de señales en carreteres. D'Andrés sorrayó que quier facese una oficialización "real y a tolos efectos" de los topónimos asturianos, lo que quier dicir que les formes toponímiques que s'apauten na Xunta Toponimia van ser les que valgan a tolos niveles llegales. Sobre sí van caltenese delles formes acastellanaes de los topónimos, los representantes de la Xunta de toponimia esclariaron qu'en casos mui concretos en qu'estes formes tengan munchu predicamentu, la solución va ser facer convivir dambes formes, siempre col oxetivu de que l'asunción de la toponimia tradicional seya un procesu "non traumáticu". En palabres de Carlos Madera "que naide se sienta estrañu pol nome del so pueblu".