Emilio León cesa como voceru de Podemos

Espón motivos personales pa dexar el cargu, anque va siguir como diputáu na Xunta.

Podemos Asturies anunció güei qu'Emilio León cesa como voceru de la formación por voluntá propia. El candidatu de la formación morada nes eleiciones "va siguir siendo diputáu nel Parllamentu asturianu y va continuar defendiendo los intereses de toles asturianes y asturianos".

"Queremos tresllada-y a Emilio el nuesu fonderu agradecimientu por l'escomanáu trabayu que desendolcó en dicha función mientres los trés años últimos, nos que foi voz de la esperanza coleutiva xenerada por más de cien mil asturianos y asturianes que nos votaron, un llabor que va continuar como diputáu de la Xunta Xeneral", espusieron dende Podemos nun comunicáu breve. Previsiblemente, y provisionalmente, Lorena Gil va ser la vocera del partíu na Cámara.