Elderson y Borja Domínguez lleguen nes hores últimes del mercáu

|

El nixerianu vien a reforzar el llateral izquierdu del Sporting, mentes que'l gallegu completa la medular del Uviéu.

Si a primer hora de la tarde confirmábase la cesión de Traoré, tiempu más tarde saltaba la sorpresa cola llegada d'otru fichaxe procedente del AS Monaco. Tratábase de Elderson Uwa Echiéjilé, llateral izquierdu nixerianu que comenzó la temporada nes files del Standard, onde disputó 6 partíos de lliga, 1 de la Copa belga y 3 de Lliga Europa.

De 29 años, Elderson ye 53 vegaes internacional con Nixeria –con 3 goles anotaos–, seleición que nun algamó la clasificación pa la Copa d'África que ta disputándose en Gabón, una competición que sí ganó nel añu na edición del 2013 en Sudáfrica. Tres formase nel so país nes files del Wikki Tourists, y pasar depués al Bendel Insurance, dio'l saltu a Europa de la mano del Stade Rennais nel 2007.

Trés temporaes en Francia con poca participación dieron pasu a una esperiencia nel Sporting Clube de Braga, onde amosó un meyor nivel y col que ganó la Copa na temporada 2012-2013. Tamién formó parte de la plantiya que perdió la final de la Lliga Europa col Porto (0-1, Falcao) l'añu siguiente, anque nun disputó esi partiu.

Nel mercáu d'iviernu de la 2013-2014 recibe una ufierta del AS Monaco, tornando asina a la lliga francesa. Nel club del Principáu tuvo al so mayor participación na temporada pasada, con 20 partíos lligueros disputaos, 2 de Lliga de Campeones –con 1 gol anotáu– y 4 de Lliga Europa, númberos que nun-y sirvieron pa continuar nel club esta campaña.

Elderson, que detaca pol so físicu y potencia, llega a Xixón, al igual que Traoré y Mikel Vesga, cedíu hasta final de temporada. Otra manera, nun se produxeron más salides que la de Rachid, cedíu al Tenerife, pese a que Carlos Castro y el so representante, Gelu Rodríguez, tuvieron aconceyaos con Nico Rodríguez tratando de forzar una cesión del xugador en busca de minutos, dalgo a lo que se negó'l Sporting.

Titular nel Córdoba

N'Uviéu tamién hebo novedaes nes últimes hores del mercau de fichaxes. Borja Domínguez llegaba cedíu, con opción de compra, procedente del Córdoba, onde taba siendo habitual nes alineaciones nos meses últimos tres la llegada de Luis Carrión al bancu.

El xugador, un centrocampista de 24 años de perfil diferente a los esistenstes na plantiya azul, de xuegu creativu, foi'l que forzó pa salir del conxuntu andaluz, al que llegó esti branu tres rescindir contratu col Celta. Enantes, xugara nes files del filial celtinha y, la temporada pasada, cedíu nel Racing de Ferrol, en Segunda División B.

Con Domínguez, Fernando Hierro suma cuatro refuerzos nel mercáu d'iviernu en cuatro posiciones diferentes: el mediapunta Saúl Berjón, el central David Costas y l'estremu uruguayu Carlos de Pena. Nel capítulu de salides, prodúxose la de Peña, que firmó pol Getafe; la d'Edu Bedia, que tomó rumbu a Zaragoza; y la d'Alaniz, que tornó al so país pa xugar nel Racing Club.

 

Contador Estadistiques