El Sporting y l'Uviéu pesquen nel mercáu estranxeru pa reforzase

|
El Sporting y l'Uviéu pesquen nel mercáu estranxeru pa reforzase

El costamarfileñu Lacina Traoré viaxa de Moscú a Xixón y l'uruguayu Carlos de Pena de Middlesbrough a Uviéu. El conxuntu carbayón podría sumar más incorporaciones.

L'oxetivu primeru del Sporting yera un estremu pa la banda izquierda, pero finalmente Nico Rodríguez apuesta por un delanteru pa reforzar la plantiya, en teoría un puestu yá cubiertu con Čop, Castro y Viguera. L'escoyíu ye Traoré, xugador de 2,03 metros d'altor perteneciente al Mónaco pero que taba en préstamu nel CSKA Moskva.

Internacional absolutu en diez ocasiones con Costa de Marfil, cola que nun acudió a la Copa d'Áfríca que se ta celebrando en Gabón y na que'l combináu costamarfileñu quedó elimináu na fase de grupos pola República Democrática del Congu y Marruecos, la so trayeutoria profesional comenzó nel Stade d'Abidjan pa pasar a la lliga rumana con 18 años, en concreto al Cluj onde tuvo trés temporaes enantes de fichar pol Kuban Krasnodar rusu tres el pagu de 6 millones d'euros. Nesti conxuntu firmó'l so meyor rexistru goliador, con 18 tantos, cifra que-y sirvió pa dar el saltu al Anzhi con un trespasu d'unos 18 millones.

En xineru del 2014, el Monaco ponía los sos güeyos, comprándolu por unos 14 millones, cediéndolu al Everton pa lo que quedaba de temporada, onde se lesionó y nun tuvo continuidá. Nel conxuntu monagescu tampoco nun consiguió trunfar, polo que tres dos temporaes nel Principáu tornó esti añu a la lliga rusa, en concreto a les files del CSKA, onde disputó 14 partíos de lliga, anotando 5 goles, y 6 de Lliga de Campeones, con 1 tantu.

Anguaño, Traoré ta en Mareo negociando col Sporting la so cesión. Nel casu de zarrase la operacion, como s'espera, el delanteru sería'l segundu refuerzu del mercáu d'iviernu pa Rubi tres el vascu Mikel Vesga, centrocampista cedíu pol Athletic Club.

Otra manera, nel capítulu de salides, Rachid va xugar lo que resta de temporada nel Tenerife en calidá de cedíu. Queda por ver si Dani Ndi sal tamién en calidá de préstamu o termina l'añu en Xixón.

Un estremu pa Hierro

Depués del frenu a la operación por parte del equipu médicu del Uviéu de la cesión del arxentín Cristian Espinoza, Fernando Hierro yá cuenta col estremu que demandaba. Trátase de De Pena, xugador zurdu de la cantera de Nacional de 24 años que dio'l saltu a Europa la temporada pasada de mano del Middlesbrough, cuando taba na segunda categoría inglesa, tres el pagu de cerca de 3 millones d'euros.

Depués disputar 6 partíos na campaña del ascensu, esti añu siguió ensin tener la confianza d'Aitor Karanka, polo que decidió salir al Uviéu como cedíu en busca de los minutos que nun tien na Premier League. El préstamu de De Pena ye hasta final de temporada y súmase a la del central del Celta, David Costas. Tamién llegó, pero llibre tres desvinculase de Pumas, Saúl Berjón.

Esti fichaxe nun zarra'l mercáu pal conxuntu azul, yá que podríen llegar más refuerzos pa Hierro enantes del zarru del mercáu esta medianueche.

 

Contador Estadistiques