Eladio Carreño Valdés, “una figura clave pal federalismu asturianu”

El 'Colectivo de Entidades Memorialistas y Republicanas de Xixón' va entamar un homenaxe a Eladio Carreño Valdés, “una figura clave pal federalismu asturianu” que foi’l redautor nel 1883 del ‘Proyecto de Constitución Federal del Estado Asturiano’, recuperáu esti sieglu n'Arxentina. Falamos sobre la so trayeutoria colos historiadores Sergio Sánchez Collantes, Faustino Zapico y Javier Cubero.

Nacíu n’Avilés el 17 de febreru del 1834, embarcó a los 12 años hacia Cuba, onde estudió la carrera de Medicina y conoció a la so muyer, cola que tornó a Asturies nel 1861 pa instalase en Xixón, ciudá de la que sería poco depués alcalde. “Ye una figura clave pal federalismu asturianu; una figura mui notable de la política de finales del sieglu XIX n’Asturies”, recuerda Faustino Zapico, que va encargase de glosar la trayeutoria y importancia de Carreño nel homenaxe convocáu pa esti domingu.

“Hai que recordalu como un políticu inquietu que contribuyó muncho a la politización de les clases trabayadores en Xixón y n’Asturies, un pionero de la democracia, adelantáu al so tiempu y pocu reconocíu anguaño, como la mayoría de los republicanos del XIX”, esplica Sánchez Collantes sobre l’avilesín. Fundador del Partido Democrático nel 1865, Carreño pronto s’averó al republicanismu federal de Francisco Pi y Margall y el so Partido Republicano Democrático Federal, “el primer partíu d’izquierda qu’esistió nun sentíu modernu de la pallabra”, esplica Cubero, y creó nel 1869 el selmanariu ‘La República Española’.

Cola llegada de la Primer República nel 1873 entró nel Ayuntamientu como conceyal, pasando a ocupar l’alcaldía mientres unos meses pola renuncia del so antecesor nel cargu, Alejandro Blanco. “Foi’l discípulu más nomáu n’Asturies de Pi y Margall”, añade Zapico, qu’apunta que Carreño “nun foi un teóricu políticu, sinón un propagandista” que se dedicaba a executar polítiques.

Tres la cayida de la República siguió trabayando poles sos idees federalistes, creando y participando en delles espublizaciones, lo que lu fixo mui popular en Xixón, al igual que la so participación en diferentes discutinios. Ente ellos destacó’l de la necesidá de contar con un puertu alcordies a les necesidaes de crecimientu industrial de la ciudá, pa lo que s’optaba por ampliar l’esistente o construyir ún nuevu, El Musel, posicionándose Carreño por esta segunda alternativa, lo que-y valió crítiques de los sos opositores y inclusive caricatures en prensa, una d’elles con boina carlista.

El proyeutu de Constitución

Nel 1881 participó na fundación del Atenéu Obreru de Xixón y nel 1882 acudió a l’Asamblea Republicana Nacional de Zaragoza, onde se constituyó’l Partido Federal Español. A la so vuelta crea l’agrupación llocal del partíu y un añu más tarde redauta el ‘Proyecto de Constitución Federal del Estado Asturiano’, que s’editó nel 1890 tres la so aprobación pola asamblea federal de la organización.

“Tuvo muncha importancia nel senu del republicanismu pimargallianiu, pero escasa repercusión fuera; aunque, visto cola distancia del tiempu, ye evidente que se trataba d’un testu muy adelantáu a la so época, y al que la historia dio la razón en bona midida”, esplica Sánchez Collantes sobre un documentu que se creyía desaniciáu y que se recuperó d’una manera soprendente. “Un día recibí un corréu d’un arxentín, Juan Carlos Pitiot, que tropezara con una de les mios investigaciones sobre’l republicanismu del XIX y esplicóme que yera nietu de Pedro Pitiot, un republicanu federal de Xixón, trabayador de la fábrica de vidru, que tuviera qu’emigrar a Arxentina a primeros del XX por razones polítiques. A partir d’ehí cruciamos delles comunicaciones y díxome que tenía un exemplar del Proyecto”, recuerda l’historiador.

Tres escribir al Conceyu de Xixón para informar del afayu y esplicar el valor del testu y la conveniencia de recuperalu, finalmente editábase nel 2009 con un estudiu introductoriu del propiu investigador, llabor nel que collaboró Ediciones Trea y el so responsable, Álvaro Díaz Huici. “Eladio Carreño escribió’l borrador porque yera’l dirixente más autorizáu y cualificáu, anque llueu sometióse a discusión nuna Asamblea Regional”, sigue esplicando’l xixonés, qu’apunta del mesmu que “se podríen destacar munchos elementos, porque nel momentu en que s’aprueba (1883) recueye munchos derechos y llibertaes que nesi momentu nun taben reconocíos”, como “el derechu de les muyeres a dir a la universidá”.

“Nun tien un calter tan social como la propuesta autonomista del 97”, añade Zapico sobre’l testu, que tamién fai mención a la ellaboración por parte de Carreño d’otru proyeutu de Constitución p’Asturies nel añu 1873, que nun conocemos, “del que podemos suponer taba influenciáu ésti”. “Ye falso que diera menos competencies que l’actual Estatutu”, apunta’l mierense, qu’esplica que na propuesta del 83 Asturies quedaba cola de Fiscalidá (soberanía fiscal) y la de Xusticia, mientes que la Federación tenía la d’Educación: “Agora tenemos la competencia d’Educación, pero ye una descentralización alministrativa”, apunta al respeuto.

“La fiscalidá qu’afitaba yera de calter progresivu y proporcional, de tal manera que los que más tienen paguen más y los que menos, paguen menos”, esplica Cubero. El Proyecto establecía un parllamentu asturianu bicameral: “Taba la Diputación Asturiana, escoyida por sufraxu universal direutu, y llueu’l Conseyu Federal, con representantes de los conceyos”.

Sobre’l nome que daba a Asturies yera’l de “Estado Soberano de Asturias, y la forma de gobiernu, una República Democrática Federativa”, añade Cubero sobre’l testu.

Na so cai en Xixón

El domingu cúmplense 185 años del nacimientu de Carreño y el 'Colectivo de Entidades Memorialistas y Republicanas de Xixón' entama un homenaxe a esti políticu, médicu y periodista na cai que lleva’l so nome na villa al altor de la escalera 6 del Muro. Ésti va desendolacase dende les 12 a les 14 hores y va consistir nuna ufienda floral onde la placa de la cai, pa depués dar pasu a les intervenciones de los miembros de los coleutivos convocantes.

Zapico, que se declara un gran siguidor del avilesín, como amuesa qu’un cuadru de Carreño presida’l so despachu, al igual que la sede d’Izquierda Asturiana (IAS), va glosar sobre la so figura nel actu, que Boni Ortiz y Iván San Segundo van zarrar con una actuación musical.