Edítase'l "Proyecto de Constitución Federal del Estado Asturiano", obra de 1883

|

Esti próximu xueves 23 d'abril va presentase na Xunta Xeneral del Principáu'l "Proyecto de Constitución Federal del Estado Asturiano", reedición d'una Constitución que los federales asturianos redactaron en 1883, obra desaparecida por más d'un sieglu y de la que se creía nun quedaba nengún exemplar. Sicasí recientemente l'historiador xixonés Sergio Sánchez Collantes atopó un exemplar, que ye'l qu'agora se reedita con un estudiu introductoriu del propiu investigador.

El testu reeditáu por TREA ye d'una edición fecha en Xixón en 1890, y acompáñalu un estudiu introductoriu del historiador Sergio Sánchez Collantes (Xixón, 1979), especialista nel republicanismu asturianu nel sieglu XIX y que yá tien publicaos otros estudios como "Los republicanos en la villa de Gijón y los orígenes del Ateneo Obrero" (2005) y "Demócratas de antaño. Republicanos y republicanismos en el Gijón decimonónico" (2007).

Un documentu históricu del federalismu asturianu

La recuperación d'esta obra supón alcontrar ún de los documentos claves del federalismu asturianu, un proyectu de Constitución Federal que conseña los ideales politicos d'esti movimientu que tanta importancia tuvo n'Asturies hasta la Guerra Civil. Un "Proyecto de Constitución Federal del Estado Asturiano" qu'entamaba con estes palabres d'ún de los sos promotores, Eladio Carreño, qu'amas sería l'alcalde de Xixón nel añu 1873:

"En la Constitución Federal Asturiana, aprobada en la Asamblea de Gijón por los representantes del Partido Federal de Asturias, se hallan condensados nuestros ideales políticos, definidos los poderes regionales, sus atribuciones, y determinadas las que corresponden a los poderes legislativo, ejecutivo y judicial, y se establecen los procedimientos con que garantizamos la libertad, asegurando el orden, la paz y la autonomía de la región."

Contador Estadistiques