El xueves rexistráronse 7 casos de COVID-19

Novena xornada siguida ensin finaos.

A falta de la espublización de los datos oficiales de la COVID-19, la Conseyería de Salú informó de la detección de 7 casos nuevos. Son la metá de los rexistraos nos dos díes últimos, cuando se comunicaron 15.

El Serviciu de Salú del Principáu d'Asturies (SESPA) fixo 1.898 pruebes de diagnósticu d'infeición activa, polo que la tasa de positividá s'asitió nel 0,47 por cientu. A 7 díes esti porcentaxe yera enantes de l'actualización del 1,11 por cientu –ayeri baxó al 1,01 por cientu–.

Nun hebo que llamentar muertes, polo que yá van nueve xornaes siguíes ensin llamentar perdes con COVID-19. El númberu d'hospitalizaos aumenta a 18 por un ingresu en planta, calteniéndose 9 pacientes na UCI.

Na semeya, Plenu del Conseyu Interterritorial del Sistema Nacional del Salud, que se celebró de manera presencial esta mañana na población canaria de Maspalomas y se centró na Atención Primaria.