El númberu de persones ingresaes con COVID-19 baxa de la ventena

Hai 8 pacientes en planta y 9 na UCI. El miércoles detectáronse 15 contaxos, mesma cantidá que'l día anterior.

La cantidá d'hospitalizaos n'Asturies con COVID-19 yá baxa de la ventena, cuando hebo na cuarta fola, el 29 de xunetu, llegó a haber 190 (160 en planta y 30 na UCI). Los pacientes ingresaos en planta con confirmación o sospecha de la enfermedá causada pol coronavirus SARS-CoV-2 son 8, 5 menos que'l martes, a los qu'hai que sumar 9 que tán na UCI, 1 menos.

A falta de la espublización de los datos oficiales de la COVID-19, la Conseyería de Salú comunicó la detección de 15 casos nuevos –l'actualización rebaxa esta cantidá en 3 por duplicaos en díes previos–. Ye la mesma cantidá rexistrada'l día anterior.

Fixéronse 2.346 pruebes de diagnósticu d'infeición activa y la tasa de positividá asitióse nel 1,02 por cientu. A 7 díes, esti porcentaxe yera enantes de l'actualización del 1,06 por cientu –ayeri xubió al 1,11 por cientu–.

Nun hai que llamentar finaos per octavu día, polo que'l total de persones que perdieron la vida nel andanciu cola COVID-19 caltiénse en 2.068.

Tornen los biltos

Asturies informó al Ministeriu de Sanidá de la esistencia de 5 biltos activos nel periodu del 20 al 26 de setiembre, 3 más que la selmana pasada, con un total de 36 casos, llueu de dos periodos ensin rexistrar nengún

Na imaxe, gráficu d'hospitalizaos del 20 d'agostu del 2020 al 28 de setiembre del 2021 –falten por actualizar los datos correspondientes a ayeri–, nel que se pueden ver los efeutos de la segunda, tercer y cuarta fola, fechu pol Observatoriu de Salú n'Asturies.