El XI Liet International quedó en casa

La cantante sami de 18 años Ella Marie Hætta Isaksen llevó esta edición del festival européu de cantares en llingües minorizaes, nel que nun hebo representación asturiana.

El tema 'Luoddaearru' foi'l que defendió la cantante natural de Deatnu, población en territoriu baxo alministración noruega, na tarde del xueves en Guovdageaidnu nuna competición musicial que tuvo un total d'ocho participantes y na que convenció tanto al xuráu como al restu de músicos participantes, que tamién votaron. Amás de la llingua sami, tuvieron representaes nel Liet International la frisia (Aafke Zuidersma, Fryslân), la baskir (Zaman, Bashkortostán Respúblikahi), el gaélicu escocés (Màiri Anna NicUalraig, Alba), el sranan tongo (Ruben Semmoh & Romeo Sumter, Surinam), l'udmurtu (Nikita Ilyin, Udmurt Elkun), el bretón (Ukan, Breizh) y el luxemburgués (La Schlapp Sauvage, Luxemburgu).

Asturies nun participó nel festival celebráu en territoriu sami depués d'acudir con temes n'asturianu o gallego-asturiano nes seis ediciones últimes. Dixebra, tamién en Laponia, foi nel 2008 el primer grupu asturianu que concursó nel Liet International.