El XI Liet International nun va tener representación asturiana

|
Troféu XI Liet International

Celébrase esti xueves na población sami de Guovdageaidnu, depués de dos años de parón, cola participación d'ocho países.

Tres seis participaciones consecutives, Asturies nun va llevar representante al Liet International. Depués de que Dixebra debutara na edición del 2008 en Luleå, tamién en territoriu sami, les ediciones siguientes (2009, 2010, 2011, 2012 y 2014) del festival européu de la canción en llingües minorizaes siempre contó con un artista o banda que defendiera l'asturianu.

El Premiu al Meyor Cantar, que se recuperó nel 2016 tres un añu de parón, daba'l billete pa participar nel Liet International, que na edición del 2012 llegó a entamar Asturies, celebrándose'l certame nel xixonés Teatru de la Llaboral. Sicasí, esta recompensa cayó de les bases y los últimos representantes asturianos, la Banda Gaitas El Trasno, tuvieron que pagase'l viaxe pa participar na edición última del Liet, celebrada nel 2014 na población baxosaxona d'Oldenburg.

Por esti motivu, Anabel Santiago, a lo que-y correspondería esti derechu nel casu de siguir la collaboración ente'l Gobiernu y la organización del Liet International, nun va tar mañana en Guovdageaidnu pa defender 'La lloca'. El certame va comenzar a les 19 hores y nella van participar Ella Marie Hætta Isaksen (sami, Laponia), Aafke Zuidersma (frisiu, Fryslân), Zaman (baskir, Bashkortostán Respúblikahi), Màiri Anna NicUalraig (gaélicu escocés, Alba), Ruben Semmoh & Romeo Sumter (sranan tongo, Surinam), Nikita Ilyin (udmurtu, Udmurt Elkun), Ukan (bretón, Breizh) y La Schlapp Sauvage (luxemburgués, Luxemburgu).

Nesta edición destaca la presencia d'una llingua non falada dientro'l continente, el sranan tongo, orixinaria de Surinam, territoriu d'América del Sur onde l'holandés ye llingua oficial pol so pasáu colonial. Otra manera, nun va contar con representación l'idioma lladín, ganador de la edición última del Liet International gracies a la interpretación de la sudtirolesa Martina Iori.

Contador Estadistiques