El TSXA frena la incineradora

Anuló'l Plan Estratéxicu de Residuos del Principáu d'Asturies (PERPA) aprobáu en marzu del 2014.

Esta decisión del Tribunal Superior de Xusticia d'Asturies (TSXA) vien tres la estimación de manera parcial d'un recursu de l'Asociación Asturiana d'Amigos de la Naturalez (AMA) y el Grupu d'Ornitoloxía Mavea y supón una torga nueva pa la incineradora, que seguramentu nun podrá entamar a furrular nel 2020 como se pretendía nel PERPA. Según informa'l Conceyu contra la Incineración la razón ye "el cambiu introducíu nel plantegamientu de xestión de residuos, yá que, una vegada concluyida la información pública, COXERSA decidió nun acometer la inversión prevista pa la planta de clasificación de basura, lo qu'implica una ‘variación na xerarquía de tratamientu de residuos al dar preferencia a la so eliminación per medio de la valorización enerxética'".

Asina, el TSXA ordena volver a someter a consulta pública el último borrador del PERPA, dilantando entovía más nel tiempu la posible incineradora que tantes crítiques recibe ente la ciudadanía. Dende la Conceyu contra la Incineración recuerden que se trata del cuartu plan fracasáu en 13 años, lo que amuesa la "incompetencia reconocida" de los xestores o responsables socialistes, señalando a "la señora Belén Fernández González (conseyera dende'l 2003 hasta güei, salvo'l 2011), asina como'l señor Santiago Fernández Fernández (sempiternu xerente de COXERSA), como exemplos de la xestión del Gobiernu asturianu".