El Gobiernu cree qu'en cuatro meses iguará la situación del Plan de Residuos

Fomentu, Ordenación del Territoriu y Mediu Ambiente estudia les víes pa restablecer la seguridá xurídica na xestión de la basura.

La conseyería señala que la sentencia del Tribunal Superior de Xusticia d'Asturies (TSXA) "nun declara nulu'l Plan de Residuos del Principado de Asturias 2014-2014, sinón qu'alvierte de la esistencia d'un defectu puntual de forma que se solucionaría con una nueva información pública previa a l'aprobación del plan", polo que "atender el requerimientu del tribunal nun implicaría volver a tramitar el documentu dende l'entamu". D'esta forma, cifra en cuatro meses el plazu nel que tardará n'iguar la situación y caltener el Plan Estratéxicu de Residuos del Principáu d'Asturies (PERPA) que trai consigo la construcción de la incineradora.

La sentencia, sicasí, foi celebrada polos coleutivos ecoloxistes y provocó reaiciones ente la oposición. Asina, Izquierda Xunida y Podemos amosaron la so disconformidá cola construcción de la incineradora, mentes que'l PP y Foro criticaron la forma d'actuar del PSOE con respeuto al PERPA.