El TSXA da'l preste a la prórroga de la llende a los axuntamientos

Va afeutar a Carreño, Xixón, Gozón y Villaviciosa, conceyos que siguen en 4+. Esti xueves rexistráronse 129 casos nuevos.

El Tribunal Superior de Xusticia d'Asturies (TSXA) aceptó'l pidimientu del Gobiernu de caltener la limitación de 10 persones non convivientes n'espacios abiertos naquellos llugares en riesgu estremu por COVID-19. Esti preste yera necesario al afeutar a derechos fundamentales.

La declaración finaba'l domingu de nueche, allargándose agora per otros 14 díes. De los ocho afeutaos anguaño salen Llaviana y Mieres al ameyorar los sos datos, con Uviéu, Gozón y Siero como únicos conceyos con opciones de dexar agora'l nivel d'alerta 4+ dada la evolución de la so incidencia acumulada a 14 díes. (ACTUALIZACIÓN: El Gobiernu confirma qu'Uviéu y Siero salen del 4+, polo que siguen nesti nivel Carreño, Xixón, Gozón y Villaviciosa)

Ensin finaos

A falta de la espublización de los datos oficiales de la COVID-19, la Conseyería de Salú informó de la detección ayeri de 129 casos nuevos. Son 60 menos que'l miércoles, cuando comunicó 189.

Fixéronse 2.074 pruebes de diagnósticu d'infeición activa, polo que la tasa de positividá s'asitió nel 8,63 por cientu, inferior tamién a la de la xornada anterior, cuando foi del 10,16 por cientu con 2.343 tests realizaos. A 7 díes, esti porcentaxe yera enantes de l'actualización del 9,69 por cientu –ayeri baxó al 9,51 por cientu–.

Nun hebo que llamentar muertes ayeri, polo que la cantidá total de finaos cola enfermedá causada pol coronavirus SARS-CoV-2 sigue siendo 2.026. Tán hospitalizaes con confirmación o sospecha de COVID-19 84 persones, a les qu'hai que sumar otres 31 na UCI, 8 y 1 menos que'l miércoles, de manera respeutiva.

Na semeya, caxa de Pfizer pal unvíu de vacunes. Esta selmana aportaron a Asturies 44.210 dosis, de los que más de 38.000 son d'esta farmacéutica y les restantes, de Moderna.